ڕاوێژکارێکی سودانی: رێککەوتنی سێ قۆڵی کێشەی مووچە بە یەکجاری چارەسەر دەکات

SNN-

ڕاوێژکارێکی سوودانی پێی وایە، ڕێککەوتنی سێقۆڵی بۆ هەناردەکردنەوەی نەوتی کوردستان، کێشەی مووچەی مووچەخۆرانی هەرێم بە یەکجاری چارەسەر دەکات.

حوسێن عەللاوی، ڕاوێژکاری محەمەد شیاع سودانی، سەرۆکوەزیرانی عێراق رایگەیاند، حکومەتی هەرێمی کوردستان و حکوومەتی فیدراڵ لە گەیشتن بەڕێککەوتن سەرکەوتوو بوون و ڕێککەوتنەکە بە ستراتیژی ناودەبات.

ئەو راوێژکارەی سودانی پێی وایە، رێککەوتنەکە بەستەڵەکی تەواوی کێشە داراییەکانی نێوان حکومەتی هەرێمی کوردستان و حکومەتی عێراق دەتوێنێتەوە، پرسی مووچەش بە یەکجاری چارەسەر دەکات.

عەللاوی جەخت لەوە دەکاتەوە، ئێستا حکوومەتی هەرێم و حکومەتی فیدراڵ هەوڵەکانیان بۆ کارکردنی لەسەر تێپەڕاندنی یاسای نەوت و گاز، چڕ کردووەتەوە.

ئاماژەی بەوەشکردووە، ڕێککەوتنی سێ قۆڵی هەناردەکردنەوەی نەوتی کوردستان، سیاسەتێکی تەواوکاری لەنێوان هەردوو حکوومەتەکە دەهێنێتە ئاراوە، دەبێتە هۆی چارەسەرکردنێکی ڕیشەیی بۆ کێشەی مووچەی فەرمانبەرانی هەرێمی کوردستان، ئێستا هەوڵەکانی حکوومەتی هەرێمی کوردستان و حکوومەتی فیدراڵ لەو پێناوەدایە.

دەشڵێت، هەروەک هەردوو حکوومەتەکە لەڕێگەی وەزارەتی سامانە سروشتییەکان و وەزارەتی نەوتی فیدراڵییەوە هەوڵەکانیان چرکردووەتەوە بۆ ئەوەی لەمەودوا ئەو کێشانە دووبارە نەبنەوە، دواتر کار لەسەر یاسای نەوت و گاز بکرێت بۆ ئەوەی کاروباری نێوان هەردوو حکوومەتەکە ڕێک بخات، لە کۆتایشدا ببێتە بنەمای کۆتایی هێنان بە کێشە داراییەکانی نێوان حوومەتی فیدراڵ و حکوومەتی هەرێمی کوردستان.