جارێکی دیکە شاسوار عەبدولواحید دادگایی دەکرێت

SNN-

ئەمڕۆ، 28ی ئەیلوولی 2025، سەرچاوەیەک لە دادگای سلێمانی رایگەیاند، جارێکی دیکە دانیشتنی دادگاییکردنی شاسوار عەبدولواحید، سەرۆکی جوڵانەوەی نەوەی نوێ بەڕێوەدەچێت.

سکاڵای پێنج رۆژنامەوان

بە وتەی سەرچاوەکە، دادگاییکردنەکەی ئەمڕۆی شاسوار عەبدولواحید، لەسەر سکاڵای پێنج رۆژنامەوانە کە پێشتر لە پەیجەکانەوە “تەشهیریان” پێکراوە.

بەگوێرەی زانیارییەکانی کەناڵ8، داواکاری گشتی کەیسەکەی جوڵاندووە و ئەمڕۆ شاسوار عەبدولواحید براوەتە بەردەم دادگا و وتەی لێوەرگیراوە.

کەیسەکانی دیکە و سزای پێشوو

شاسوار عەبدولواحید زیاتر لە 80 کەیسی جۆراوجۆری لەسەرە و بە وتەی داواکاری گشتی، لەسەر سەرجەم کەیسەکان دادگایی دەکرێت.
ئەمە لە کاتێکدایە کە پێشتر، لە 2ی ئەیلولی 2025، دادگای سلێمانی لەسەر سکاڵایەکی دیکە، شاسوار عەبدولواحیدی بە پێنج مانگ زیندانیکردن سزا دابوو. ئەو سزایە لە بنەڕەتدا و بە شێوەی نائامادەیی لە 3ی ئابی 2025 بە شەش مانگ زیندانیکردن دەرچووبوو، بەپێی ماددەی 431 لە یاسای سزادانی عێراقی.

سزاکەی پێشووی پەیوەندی بە سکاڵایەکی شادی نەوزاد، پەرلەمانتاری پێشووی نەوەی نوێ، هەبوو بە تۆمەتی هەڕەشەلێکردن، کە لەسەر ئەو سکاڵایە لە 12ی ئابدا دەستگیر کرا و سێ دانیشتنی دادگایی بۆ بەڕێوەچوو