“هەرچەندە رێككەوتنی نەوت كورتخایەنە، بەڵام بناغەیەكە بۆرێككەوتنی درێژخایەن لەداهاتوودا”
عەلی حەمەسەعید-SNN
ئەندامێكی ئەنجوومەنی نوێنەرانی عێراق ئاماژە بەوەدەكات، لەگەڵ ئەوەی ڕێككەوتنی ئەمجارەی هەرێم و بەغدا لەسەر پرسی نەوت كورتخایەنە و بۆماوەی سێ مانگە، بەڵام هیوایەك هەیە لەداهاتوودا درێژە بەم ڕێككەوتنە بدرێت، ئەوەش دەبێتە هۆی چارەسەركردنی كێشەی مووچە.
د. موسەننا ئەمین، ئەندامی ئەنجوومەنی نوێنەرانی عێراق بە SNNی ڕاگەیاند: رێككەوتنی نێوان هەرێم و بەغدا لەسەر بابەتی هەناردەكردنەوەی نەوتی هەرێم تاڕادەیەك جیاوازە، ئەوەش بەهۆی ئەوەی كۆمپانیا نەوتییەكان بەشێكن لە ڕێككەوتنەكە بۆیە ئەمە پاڵنەرە كە لەداهاتوودا درێژە بە ڕێككەوتنەكە بدرێت چونكە بەرژەوەندی هەرسێ لایەنەكەی تێدایە.
ئاماژەی بەوەشكرد، ئەم ڕێككەوتنەی كە بۆ هەناردەكردنەوەی نەوت كراوە كورتخایەنە و بۆماوەی سێ مانگە، بەڵام گەشبینم بەوەی كە دوای سێ مانگەكەش بەردەوام دەبێت، هاوكات ئەم ڕێككەوتنە دەبێتە بناغە بۆ ئەوەی لەداهاتوودا ئەگەر ڕێككەوتنی نوێ بكرێت لەسەر بابەتی نەوت و داهات نەتواندرێت بە ئاسانی ڕێككەوتنەكان تێكبچن.
ئەو ئەندامەی ئەنجومەنی نوێنەرانی عێراق ئەوەشی خستەڕوو، ئەوەی ئێستا ماوەتەوە لەنێوان هەولێر و بەغدا ڕێككەوتنی لەسەر بكرێت بابەتی داهاتی نانەوتییە، ئومێد هەیە ئەو بابەتەش ڕێككەوتنی لەبارەوە بكرێت چونكە ئەوەی قورس بوو دۆسیەی نەوت بوو، بەچارەسەركردنی ئەو دوو گرفتەش گرفتی دواكەوتن و دابەشنەكردنی مووچە چارەسەر دەبێت.
