کرێکارێک لە پڕۆژەی مایۆرکا سیتی لە سلێمانی گیانی لەدەستدا

SNN

کرێکارێک لەکاتی کارکردنیدا لە پڕۆژەی نیشتەجێبوونی “مایۆکا سیتی” لە سلێمانی، لە نهۆمی نۆیەمەوە کەوتە خوارەوە و دەستبەجێ گیانی لەدەستدا. رێکخراوی کرێکارانی بیناسازیش رایدەگەیەنێت، ئەمە سێیەم حاڵەتی گیانلەدەستدانە لە هەمان پڕۆژەدا و رەخنە لە نەبوونی سەلامەتیی کار دەگرێت.

عوسمان زیندانی: ژینگەی کار لە هەرێم ستاندارد نییە

عوسمان زیندانی، سەرۆکی رێکخراوی کرێکارانی بیناسازی، لە کۆنفرانسێکی رۆژنامەوانیدا رایگەیاند: “تاوەکو ئێستا ژینگەی کار لە هەرێمی کوردستان بەگوێرەی ستانداردە نێودەوڵەتییەکان نییە و رەخنەکانمان ئاڕاستەی حکومەتی هەرێمی کوردستان و خاوەنکارەکان دەکەین”. گوتیشی، “بەشێکی زۆری رێککەوتننامە نێودەوڵەتییەکانی تایبەت بە سەلامەتیی شوێنی کار لە هەرێمی کوردستان جێبەجێ ناکرێن”.

قوربانییەکە ناوی “ئاروین ئیسماعیل”ـە

سەرۆکی رێکخراوی کرێکاران ناسنامەی کرێکارەکەی ئاشکرا کرد و گوتی: “ئەو کرێکارەی ئەمڕۆ گیانی لەدەستداوە ناوی ئاروین ئیسماعیل موستەفایە، خەڵکی گوندی مووسەکی شارباژێڕە و لەدایکبووی ساڵی 1983ـە (تەمەن 42 ساڵ)”. ناوبراو خێزاندار بووە و سەرجەم براکانیشی کرێکارن.

ئامارێکی مەترسیدار: 51 کرێکار لەمساڵدا گیانیان لەدەستداوە

بەگوێرەی ئامارەکان، لە سەرەتای ئەمساڵەوە تاوەکو ئێستا 51 کرێکار لە هەرێمی کوردستان و ناوچەکانی چەمچەماڵ و کەرکوک لەکاتی کارکردندا گیانیان لەدەستداوە، کە بە “ژمارەیەکی مەترسیدار” دادەنرێت. هەر بەپێی ئامارەکان، تەنها لە ماوەی 20 رۆژی رابردوودا لە شاری کەرکوک پێنج کرێکار گیانیان لەدەستداوە.