پڕۆژەی ڕووناکی ، لە مانگی ڕابردوودا 80%ی هاوبەشانی ماڵان لە هەڵەبجە کەمتر لە 15 هەزاریان بۆ گەڕاوەتەوە.
پێوەری زیرەکی کارەبا
SNN
وەزارەتی کارەبای حکومەتی هەرێمی کوردستان لە ڕاگەیەنراوێكدا خۆشحاڵی خۆی بە دابەشکردنی پسووڵەی کارەبای مانگی 9 بۆ هاوبەشانی ماڵان و بازرگانی پارێزگای هەڵەبجە لەچوارچێوەی پڕۆژەی ڕِووناکی دەردەبڕێت و دەڵێت: 80%ی هاوبەشانی ماڵان لە هەڵەبجە کەمتر لە 15 هەزاریان بۆ گەڕاوەتەوە.
ڕوونیشی كردۆتەوە، پسووڵەی مانگی 9 یەکەم پسووڵەیە بۆ هاوبەشانی کارەبا لە هەڵەبجە دوای ئەوەی پارێزگاکە لە کۆتایی مانگی ڕابردوو بووە یەکەم پارێزگا لەسەر ئاستی هەرێمی کوردستان و عێڕاق کە کارەبای 24 کاتژمێری بۆ دابین بکرێت و لە ئەنجامدا زیاتر لە 60 مۆلیدەی گەڕِەکەکان کوژێندرانەوە.
خشتەی یەکەم: دوای 50٪ پاڵپشتی حکومی بڕِی پسووڵەی 80٪ی هاوبەشانی کارەبا لە هەڵەبجە بۆ مانگی 9 کەمترە لە:
هاوبەشانی ماڵان: 15,000
هاوبەشانی بازرگانی: 61,000
خشتەی دووەم: ژمارەی هاووڵاتیان و شوێنە بازرگانییەکان لە پڕۆژەی ڕووناکی بەپێی شارەکان:
کوردستان/
هاوڵاتیان: 3،770،000
شوێنە بازرگانییەکان: 120،000
هەولێر/
هاوڵاتیان: 1،935،000
شوێنە بازرگانییەکان: 61،000
سلێمانی/
هاوڵاتیان: 1،345،000
شوێنە بازرگانییەکان: 35،000
دهۆک/
هاوڵاتیان: 351،000
شوێنە بازرگانییەکان: 20،000
هەڵەبجە/
هاوڵاتیان: 139،000
شوێنە بازرگانییەکان: 4،000
وەزارەتی كارەبا دەشڵێت: تاوەکو ئەمڕۆ، نزیکەی 4 ملیۆن هاووڵاتی کە زیاترە لە ٪50ی هاووڵاتیانی کوردستان کارەبای 24 کاتژمێرییان بۆ دابینکراوە لەڕێگای پڕۆژەی ڕووناکی و سەنتەری هەموو پارێزگاکان کارەبای بەردەوامییان بۆ دابینکراوە.
جەختیشی كردۆتەوە، بەپێی نرخە نوێیەکان، ٪80ی هاوڵاتیان، بەتایبەتی کەمدەرامەتان، پارەیەکی کەمتر دەدەن لە جاران بە بەراورد بەو پارەیەی پێشتر دەیاندا بۆ کارەبای مۆلیدە و کارەبای نیشتمانی.
مانگی تشرینی دووەمی ساڵی 2024 مەسرور بارزانی، سەرۆكی حکومەتی هەرێمی كوردستان، پڕۆژەی ڕووناکی ڕاگەیاند. دواتر لە مانگی ئایاری ئەمساڵ، ئەنجومەنی وەزیرانی حکومەتی هەرێمی کوردستان بەکۆی دەنگ بڕیاری لەسەر نرخە نوێیەکانی کارەبادا لەچوارچێوەی پڕۆژەی ڕِووناکی بۆ دابینکردنی کارەبای 24 کاتژمێری لە سەرانسەری هەرێمی کوردستان تاوەکو کۆتایی ساڵی 2026.
پڕۆژەی ڕووناکی کارەبای 24 کاتژمێری بۆ هەموو کوردستان دابین دەکات تاوەکو کۆتایی ساڵی 2026, هەروەها حکومەتی هەرێمی کوردستان ڕایگەیاندووە، کە تاوەکو کۆتایی ساڵی 2025 ناو سەنتەری شارەکانی هەرێمی کوردستان دەبنە خاوەنی کارەبای 24 کاتژمێری.
