شاسوار عەبدولواحید: لەڕووى شوێن و مامەڵەى زیندانەوە کێشەم نییە

SNN-

شاندێکی باڵای دەستەی سەربەخۆی مافی مرۆڤی هەرێمی کوردستان لە چاکسازیی گەورانی سلێمانی، سەردانی شاسوار عەبدولواحید، سەرۆکی زیندانیکراوی جووڵانەوەی نەوەی نوێی کرد و لە نزیکەوە گوێی لە داواکارییەکانی گرت.

دۆخی شاسوار عەبدولواحید لە زیندان

لە راگەیەندراوێکدا دەستەی سەربەخۆی مافی مرۆڤ بڵاویکردووەتەوە کە رۆژی یەکشەممە، 5ی تشرینی یەکەمی 2025، شاندێک بە سەرۆکایەتیی مونا یاقو، سەرۆکی دەستە، سەردانی شاسوار عەبدولواحیدیان کردووە و گفتوگۆیان لەگەڵدا ئەنجامداوە.

بە پێی راگەیەندراوی دەستەکە، شاسوار عەبدولواحید پێی راگەیاندوون کە لەڕووی تەندروستی، شوێنی مانەوە و مامەڵەی هێزە ئەمنییەکانەوە هیچ کێشەیەکی نییە.

“کەیسەکەم یاسایی نییە”

سەرۆکی نەوەی نوێ جەختی لەوە کردووەتەوە کە “کەیسەکەی کێشەی یاسایی هەیە و بە هیچ شێوەیەک یاسایی نییە”. بە وتەی دەستەی مافی مرۆڤ، شاسوار عەبدولواحید پرسیاری ئەوەی کردووە کە بۆچی کەیسەکەی کە لە ساڵی 2019ەوە هەبووە، تا ئێستا کاری لەسەر نەکراوە و لە 8ی شوباتی 2025 فەرمانی دەستگیرکردنی بۆ دەرچووە، بۆیە کاتی دەستگیرکردنەکەی بە “جێگای پرسیار” و کەیسەکەشی بە “سیاسی” ناوبردووە.

شاسوار عەبدولواحید داوای لە دەستەی سەربەخۆی مافی مرۆڤ کردووە، کە رۆڵی گرنگی خۆی ببینێت و لەڕووی یاساییەوە چاودێریی دۆسیەکەی بکات و بەدواداچوونی وردی بۆ ئەنجام بدات.