ترەمپ رێککەوتنی ئیسرائیل و حەماسی راگەیاند

SNN-

سەرۆکی ئەمریکا، رێککەوتنێکی لەنێوان ئیسرائیل و حەماس لەسەر قۆناغی یەکەمی کۆتاییهێنان بە جەنگی غەززە راگەیاند و دەشڵێت: شانازی بە راگەیاندنی رێککەوتنەکەوە دەکات و بەمزوانەش سەرجەم بارمتەکان ئازاد دەکرێن.”

وردەکارییەکانی قۆناغی یەکەمی رێککەوتنەکە

دوای چەندین رۆژ دانوستانی ناڕاستەوخۆ بە نێوەندگیریی ئەمریکا، میسڕ، تورکیا و قەتەر، هەردوو لا لەسەر قۆناغی یەکەم رێککەوتوون کە ئەم خاڵانە لەخۆدەگرێت:

ئازادکردنی بارمتە و زیندانییەکان: لە بەرامبەر ئازادکردنی 20 بارمتەی زیندووی ئیسرائیلی، ئیسرائیل زیاتر لە هەزار زیندانیی فەڵەستینی ئازاد دەکات، کە 250 کەسیان سزای زیندانیی هەتاهەتاییان هەیە و 1,700 کەسی دیکەشیان دوای 7ی تشرینی یەکەمی 2023 دەستگیرکراون.

کشانەوەی ئیسرائیل: هێزەکانی ئیسرائیل دەکشێنەوە بۆ ئەو هێڵەی کە لەسەری رێککەوتوون.

ئاگریەست و هاوکاری: شەڕ و پێکدادانەکان رادەگیرێن و رێگە بە گەیاندنی هاوکارییە مرۆییەکان بۆ کەرتی غەززە دەدرێت.

واژۆکردن: سەرچاوەیەکی ئاگادار رایگەیاندووە، واژۆکردنی فەرمیی رێککەوتنەکە ئەمڕۆ پێنجشەممە لە میسڕ بەڕێوەدەچێت.

پلانی ترەمپ بۆ داهاتووی غەززە

رێککەوتنەکە بەشێکە لە پلانێکی گەورەتری ترەمپ بۆ کۆتاییهێنان بە جەنگ، کە ئەم خاڵانە لەخۆدەگرێت:

ئازادکردنی هەموو بارمتەکان.
داماڵینی چەک لە بزووتنەوەی حەماس.
کشانەوەی تەواوەتیی هێزەکانی ئیسرائیل لە کەرتی غەززە.
بەڕێوەبردنی غەززە لەلایەن لیژنەیەکی فەڵەستینیی تەکنۆکرات و شارەزایانی نێودەوڵەتی.
دامەزراندنی “ئەنجوومەنی ئاشتی” بە سەرۆکایەتیی ترەمپ و ئەندامێتیی تۆنی بلێر، سەرۆک وەزیرانی پێشووی بەریتانیا، بۆ سەرپەرشتیکردنی ئیدارەی نوێ.
دوورخستنەوەی حەماس لە هەر رۆڵێک لە بەڕێوەبردنی غەززەدا.
کاردانەوەکان

رێککەوتنەکە کاردانەوەی ناوخۆیی و نێودەوڵەتیی بەدوای خۆیدا هێنا:

بنیامین نەتانیاهۆ، سەرۆک وەزیرانی ئیسرائیل رایگەیاند، حکومەتەکەی کۆدەبێتەوە بۆ پەسەندکردنی رێککەوتنەکە و گەڕاندنەوەی بارمتەکان.

خەڵکی غەززە: دوای بڵاوبوونەوەی هەواڵەکە، هاوڵاتییان لە ناوچەی مەواسی لە باشووری کەرتی غەززە دەستیان بە ئاهەنگگێڕان کرد. هاوڵاتییەک وتی: “کاتێک هەواڵەکەم بیست، نەمتوانی کۆنترۆڵی خۆم بکەم و فرمێسک بە چاوەکانمدا هاتە خوارەوە.”

نەتەوە یەکگرتووەکان: ئەنتۆنیۆ گۆتێرێس، سکرتێری گشتیی نەتەوە یەکگرتووەکان، پێشوازیی لە رێککەوتنەکە کرد و داوایکرد بگەنە ئاگربەستێکی هەمیشەیی و وتی، “دەبێت ئازارەکان کۆتاییان پێبێت.