نووری مالیکی: بافڵ تاڵەبانی هەمان ڕۆڵی مام جەلال دەگێڕێت
SNN
کۆبوونەوەی نێوان بافڵ جەلال تاڵەبانی، سەرۆکی یەکێتیی نیشتمانیی کوردستان و نووری مالیکی، سەرۆکی هاوپەیمانیی دەوڵەتی یاسا لە بەغدا کۆتایی هات و مالیکی ستایشی ڕۆڵی سەرۆکی یەکێتی دەکات لە جێگیرکردنی پەیوەندییەکانی هەولێر و بەغدا.
دوای کۆبوونەوەکە، نووری مالیکی لە لێدوانێکدا ئاماژەی بە گرنگیی ڕۆڵی بافڵ جەلال تاڵەبانی کرد و وتی: “بافڵ جەلال تاڵەبانی هەمان ئەو ڕۆڵە دەگێڕێت کە پێشتر مام جەلال دەیگێڕا.”
وتیشی: “بافڵ جەلال تاڵەبانی ڕۆڵێکی کاریگەریی لە ڕێککەوتنی هەولێر و بەغدا هەبوو، بەهۆی ئەوەوە ئێستا پەیوەندییەکان جێگیرە.”
یەکێک لە دەرەنجامە گرنگەکانی کۆبوونەوەکە، بابەتی مووچە بوو. نووری مالیکی ڕایگەیاند: “ڕێککەوتن لەسەر مووچە کراوە.” هەردوولا جەختیان لە پابەندبوون بە ڕێککەوتنی نەوت کردەوە، بە شێوەیەک کە مافی خەڵک و مووچە پارێزراو بێت.
سەبارەت بە هەڵبژاردنەکان، مالیکی وتی: “جەخت لە هەڵبژاردنێکى پاک و بێگەرد دەکەینەوە.” هەردوولا هاوڕابوون لەسەر پێویستیی ڕەخساندنی زەمینەیەکی لەبار بۆ ئەنجامدانی پرۆسەیەکی دیموکراسیی شارستانی.
