لە کارنامەی کۆبوونەوەی ئەنجوومەنی وەزیراندا باسی مووچەی تێدا نییە

SNN

ئەمڕۆ، سێشەممە، ئەنجوومەنی وەزیرانی عێراق کۆبوونەوەی ئاسایی خۆی ئەنجام دەدات، بەڵام بەپێی زانیارییەکان، پرسی مووچەی هەرێمی کوردستان لە کارنامەی کۆبوونەوەکەدا نابێت، چونکە بڕیاری خەرجکردنی لە هەفتەی ڕابردووەوە دراوە.

وردەکارییەکانی کۆبوونەوەکەی ئەمڕۆ

ڕاوێژکارێکی باڵای سەرۆک وەزیرانی عێراق بە کەناڵ8ـی ڕاگەیاندووە کە کاتژمێر 1ـی پاشنیوەڕۆ، دانیشتنی هەفتانەی ئەنجوومەنی وەزیران بە سەرپەرشتیی محەمەد شیاع سوودانی بەڕێوەدەچێت. هەروەها ئاماژەی بەوەشکردووە کە لە کۆی چوار وەزیرە کوردەکە، تەنها دوانیان ئامادە دەبن، چونکە وەزیرانی دەرەوە و ژینگە لە دەرەوەی وڵاتن.

هەفتەی ڕابردوو بڕیاری مووچە درا

هەمان ڕاوێژکار جەختی کردەوە کە لەم کۆبوونەوەیەدا باسی مووچە ناکرێت، چونکە بڕیاری خەرجکردنی لە کۆبوونەوەی هەفتەی ڕابردوودا دراوە. جێی باسە، هەفتەی ڕابردوو دوای کۆبوونەوەی ئاسایی ئەنجوومەنی وەزیران، کۆبوونەوەیەکی تایبەت لەنێوان سوودانی و وەزیرە کوردەکان، خالید شوانی، فوئاد حوسێن، و بەنگین ڕێکانی، لەبارەی مووچەی هەرێمەوە بەڕێوەچوو.

لەو کۆبوونەوەیەدا، سوودانی ڕایگەیاندبوو: “ڕاستە گرفت لە میکانیزمی داهاتی نانەوتیدا هەیە، بەڵام ئەم گرفتانە نابنە بەربەست لەبەردەم ناردنی مووچە.” هەروەها جەختیشی کردەوە کە “لە زووترین کاتدا” بڕیاری خەرجکردنی مووچەی مووچەخۆرانی هەرێمی کوردستان دەدرێت.