چارەنووسی 12 مووچەی پاداشتی خانەنشینان ئاشکرا دەکرێت

SNN-

سەرچاوەیەکی باڵا لە وەزارەتی دارایی هەرێمی کوردستان ڕایدەگەیەنێت، لیستی ناوی سەرجەم ئەو خانەنشینانەی شایستەی وەرگرتنی پاداشتی 12 مووچەی خزمەتن، ڕەوانەی بەغدا کراوە و پێویستە پێش کۆتایی ئەمساڵ پارەکەیان بۆ خەرج بکرێت.

لیستی مانگانە ئاراستەی بەغدا دەکرێت

ئەو سرچاوەیە راشیگەیاند، وەزارەتی دارایی هەرێم مانگانە لیستی ئەو فەرمانبەرانەی مامەڵەی خانەنشینییان تەواو دەبێت، لەگەڵ لیستی مووچەدا ئامادە دەکات و داوای خەرجکردنی پاداشتی 12 مووچەکە لە بەغدا دەکات.

ڕێککەوتنی نێوان هەرێم و بەغدا

بەگوێرەی ڕێککەوتنی نێوان هەردوو وەزارەتی دارایی هەرێم و فیدراڵ:

• پاداشتی شەش مووچە: خەرجکردنی پاداشتی مۆڵەتی کۆکراوە (شەش مووچە) لە ئەستۆی حکومەتی هەرێمی کوردستانە.

• پاداشتی 12 مووچە: وەزارەتی دارایی فیدراڵ بەڵێنی خەرجکردنی پاداشتی خزمەتی فەرمانبەریی (12 مووچە) داوە، بەڵام تاوەکو ئێستا پارەکەی خەرج نەکردووە.

وەزارەتی دارایی هەرێم داوای کردووە کە بەغدا پێش کۆتاییهاتنی ساڵی دارایی لە مانگی کانوونی یەکەمدا، پاداشتی ئەو خانەنشینانە خەرج بکات.

بنەمای یاسایی پاداشتەکە

بەپێی یاسای ژمارە نۆی ساڵی 2014، هەر فەرمانبەرێک ئەگەر خزمەتی لە 25 ساڵ زیاتر بێت و خانەنشین بێت، شایستەی وەرگرتنی 12 مووچەی بنەڕەتییە وەک پاداشت.

ئەو فەرمانبەرانەی سەرەتای ئەمساڵ بەهۆی یاساکەوە خانەنشین کران و شایستەی وەرگرتنی ئەم پاداشتەن، تاوەکو ئێستا پارەکەیان بۆ خەرج نەکراوە.