هەڵەبجە لە چاوەڕوانی هاتنی زیاتر لە 300 هەزار گەشتیاردایە

عەلی حەمەسەعید-SNN

ئامادەکارییەکان بۆ بەڕێوەبردنی 11هەمین ڤیستیڤاڵی هەنار لەپارێزگای هەڵەبجە دەستیان پێکردووە، ئەندامێکی لیژنەی سەرپەرشتی ڤیستیڤاڵەکەش ئاماژەبەوەدەکات چاوەڕێدەکرێت لەماوەی سێ ڕوژی ڤیستیڤاڵەکەی ئەمساڵدا 300 هەزار گەشتیار سەردانی ڤیستیڤاڵەکە بکەن کە زیاتر لە 500دوکان لەخۆدەگرێت.

ئەرسەلان عابد، ئەندامی لیژنەی باڵای 11هەمین فێستیڤاڵی هەنار بەSNNی ڕاگەیاند: ماوەی چەند ڕۆژێکە ئامادەکارییەکانمان بۆ بەڕێوەبردنی 11هەمین ڤیستیڤاڵی هەنار دەستپێکردووە، کە ئەمساڵیش لەپارکی گشتی هەڵەبجە ڤیستیڤاڵەکە بەڕێوەدەچێت، هاوکات جگە لە لیژنەی لاوەکی و گشتی، لیژنەی باڵا هەیە و لەلایەن چوار کەسەوە سەرپەرشتی دەکرێت.

ئاماژەی بەوەشکرد،بۆ فێستیڤاڵی ئەم ساڵ، 550 دووکان ئامادەدەکرێن لەوژمارەیش 250 دووکان تایبەتن بە فرۆشتنی هەنار، بەرهەمە پاییزییەکانی دیکە، شیرەمەنی، هەنگوین و خۆراکە وشکەکان، کە خۆماڵی بن، هاوکات نزیکەی 200 دووکانی دیکەش تایبەت دەبن بە خواردنگە و فرۆشتنی خواردن.

ئەو ئەندامەی لیژنەی باڵای ئامادەکاری ڤیستیڤاڵی هەنار ئەوەشی خستەڕوو، ساڵی ڕابردوو هەرچەندە کەشوهەوا هاوکار نەبوو لە ڕۆژانی ڤیستیڤاڵ بارانێکی زۆر باری و؟ئەوەش کاریگەری کردە سەرهاتنی ژمارەی گەشتیاران، بەڵام بۆ ئەمساڵ چاوەڕێدەکەین 300هەزار گەشتیار سەردانی ڤیستیڤاڵی هەنار بکەن، هاوکات چاوەڕێش دەکەین ئەمساڵ بڕێکی زیاتر لە کاڵا و خۆراکەکانی ناو ڤیستیڤاڵەکە بفرۆشرێن.