كەشناسیی عیراق: ئەمشەو لە بەشێك لە ناوچە شاخاوییەكانی هەرێم باران دەبارێت

SNN-

بەپێی پێشبینییەكانی كەشناسیی عێراق، نزمەپاڵەپەستۆیەك لە نیمچەدوورگەی عەرەبی و بارستەهەوایەكی سارد لە توركیاوە ڕوو لە عێراق و هەرێم دەكەن و بەهۆیەوە ئەمشەو لە بەشێك ناوچە شاخاوییەكان باران دەبارێت.

كەشناسیی عێراق رایگەیاند، نزمەپاڵەپەستۆیەك لە نیمچەدوورگەی عەرەبی و بارستەهەوایەكی سارد لە توركیاوە روو لە عیراق دەكەن و بەهۆیەوە ناجێگیرییەك لە كەشوهەوای عێراقدا دروست دەكات، بەتایبەت لە ناوچە جیاوازەكانی هەرێمی كوردستان.

ئەوەشی خستووەتە ڕوو، كاریگەریی ئەو نزمەپاڵەپەستۆ و بارستەهەوا ساردە زیاتر لەسەر هەولێر و دوهۆك و نەینەوا چڕتر دەبێتەوە و دەبێتە هۆی بارانبارین لە ناوچەشاخاوییەكانی سنوری ئەو پارێزگایانەدا.

كەشناسیی عێراق دەشڵێت، لە بەشێك لە ناوچە شاخاوییەكانی هەرێمی كوردستان و ئەو ناوچانەی بارانبارین دەیانگرێتەوە، هەورەبروسكە دەبێت و لە نیوەی شەودا كۆتایی پێدێت.