SNN-
شاری کەرکوک مێژوویەکی نوێی لە بواری پیشەسازیدا تۆمار کرد، کاتێک ئەمڕۆ دووشەممە، ڕێکەوتی 27-10-2025 بەردی بناغەی کارگەی کۆمپانیای “ئوروک” بۆ دروستکردنی ئۆتۆمبێل لەلایەن ڕێبوار تەها، پارێزگاری کەرکوکەوە دانرا، ئەم پڕۆژەیە بە یەکەم و گەورەترین پڕۆژەی لەم جۆرە لەسەر ئاستی عێراق دادەنرێت و ئامانجی گۆڕینی کەرکوکە بۆ ناوەندێکی گرنگی پیشەسازی لە ناوچەکەدا.
“گرنگترین پڕۆژە لە مێژووی کەرکوکدا”
پارێزگاری کەرکوک، ڕێبوار تەها، لە وتارێکدا پڕۆژەکەی بە “گرنگترین کارگە لە کەرکوک” وەسف کرد و ڕایگەیاند کە ئەمە یەکەم کارگەی دروستکردنی ئۆتۆمبێلە لە عێراقدا. ناوبراو جەختی کردەوە کە ئەم هەنگاوە بازدانێکی گەورە دەبێت بۆ ئابووریی شارەکە و تەواوی عێراق.
هاوبەشیی نێودەوڵەتی و ئامانجی جیهانی
ڕێبوار تەها ئاشکرای کرد، کە ئەم پڕۆژە ستراتیژییە بە هاوبەشیی چەند وڵاتێکی پێشکەوتووی پیشەسازی ئەنجام دەدرێت و وتی: “ئەمریکا، ئەڵمانیا و تورکیا بەشدارن لەم پڕۆژەیەدا.” ئامانجی کارگەکە تەنها پڕکردنەوەی پێداویستیی ناوخۆ نییە، بەڵکو ئامانجی گەورەتری هەیە، وەک پارێزگاری کەرکووک وتی: “دەمانەوێت ئۆتۆمبێلی کەرکووک بچێتە وڵاتانی جیهان.”
هەلی کار و توانای بەرهەمهێنان
یەکێک لە گرنگترین لایەنەکانی ئەم پڕۆژەیە، ڕەخساندنی هەلی کارە بۆ دانیشتوانی ناوچەکە، ڕێبوار تەها ڕایگەیاند: “کارگەکە زۆرترین هەلی کار لە کەرکووک دەڕەخسێنێت.” سەبارەت بە توانای بەرهەمهێنانی کارگەکە، پارێزگاری کەرکووک ئاماژەی بەوەدا: “کۆمپانیاکە لە قۆناغی یەکەمدا ساڵانە هەزار ئۆتۆمبێل بەرهەمدەهێنێت،” کە بڕیارە ئۆتۆمبێلی جۆراوجۆری وەک کارەبایی، بەنزین و دیزڵ لەخۆبگرێت.
پڕۆژەکە دەکەوێتە شارەدێی لەیلان لە کەرکوک و چاوەڕوان دەکرێت لە ئایندەیەکی نزیکدا دەست بە کاری بەرهەمهێنان بکات، کە ئەمەش وەرچەرخانێکی گەورە لە ئابووری و پیشەسازیی ناوچەکەدا دروست دەکات.
