“سیاسەتی “گفتوگۆ لە بری هەڕەشە” هۆکاربوو بۆ چارەسەرکردنی پرسی مووچە”
سۆزان مەنسور، وتەبێژی فراكسیۆنی یەكێتی لە ئەنجوومەنی نوێنەرانی عێراق | فۆتۆ: Rudaw
عەلی حەمە سەعید-SNN
ئەندامێكی پەرلەمانی عێراق ئاماژە بەوەدەكات، سەردانەكانی سەرۆكی یەكێتی و بەكارهێنانی سیاسەتی گفتوگۆ لەگەڵ بەرپرسانی بڕیاربەدەستی بەغدا هۆكار بوو بۆ ئەوەی هەرێم و بەغدا بگەنە ڕێككەوتن و ناردنی مووچە بەردەوامی هەبێت، پێچەوانەی ئەو سیاسەتەی تەنها هەڕەشە دەكات و كرداری نییە.
سۆزان مەنسور، ئەندامی ئەنجومەنی نوێنەرانی عێراق، بە SNNی ڕاگەیاند: لە ئێستا و ڕابردوو داهاتووشدا یەكێتی نشتیمانی كوردستان بەگشتی و خودی ( بافڵ جەلال تاڵەبانی) سەرۆكی یەكێتی هەمیشە باوەڕیان بەوە هەبووە كە دەبێت چارەسەری كێشەكان بە گفتوگۆبێت لەنێوان هەرێم و بەغدا، ئەوەش هەمان سیاسەتی ( مام جەلال) بوو لەڕابردوودا كە بەهەمان شێوە كاری دەكرد و دەستكەوتی زۆر گەورەی بۆ گەلەكەمان بەدەستهێنا.
ئاماژەی بەوەشكرد، لەئێستادا كە هەرێم و بەغدا تاڕادەیەكی باش لێكنزیك بوونەتەوە و ناردنی مووچە بەردەوامی هەیە، ئەوە لە ئەنجامی ئەو سەردانانەی ( بافڵ جەلال تاڵەبانی) سەرۆكی یەكێتی بوو بۆ بەغدا، چونكە لەسەردانەكانیدا لەگەڵ بڕیار بەدەستانی بەغدا بەگفتوگۆ باسیان لەچارەسەركردنی كێشەكان كردووە نەك هەڕەشەكردن و ئاڵۆزكردنی زیاتری بارودۆخەكە.
ئەو ئەندامەی پەرلەمانی عێراق ئەوەشی خستەڕوو، ئەو سیاسەتەی كە هەمیشە هەڕەشەكردنی كردووە بە چارەسەر بۆ گرفتەكانی بەغدا و هەرێم جگە لەوەی بەو هەڕەشانە بارودۆخەكەیان زیاتر ئاڵۆزكردووە، لەهەمان كاتیشدا هۆكاربووە بۆ ئەوەی ناردنی پارەو دابەشكردنی مووچە زیاتر دوابكەوێت.
