باجی درۆیەک؛ چیرۆکی تراژیدیی ڕێکار و بەڵێنە ساختەکەی ئەژی ئەمین
رێکار
SNN-
چیرۆکی گیانلەدەستدانی ڕێکار، گەنجێکی خەڵکی باڵەکایەتی، لە ڕووداوەکانی “لالەزار”دا، تەنها چیرۆکی کوژرانی گەنجێک نییە، بەڵکو پەردە لەسەر سیناریۆیەکی مەترسیداری فێڵکردن، بەکارهێنانی گەنجان بۆ مەرامی سیاسی و پیلانگێڕییەک هەڵدەداتەوە کە بەڵێنی دامەزراندن دەروازەکەی بووە و مردنیش کۆتاییەکەی.
ڕێکار کێ بوو و چۆن کەوتە داوی بەڵێنەکانەوە؟
ڕێکار، کوڕی خێزانێکی تێکۆشەری دێرینی یەکێتیی نیشتمانیی کوردستان بوو لە باڵەکایەتی. گەنجێک بوو وەک هەموو گەنجێکی دیکەی بێکار، بەدوای هەلی کار و دامەزراندنێکدا دەگەڕا. بەپێی قسەی دایک و باوکی جەرگسووتاوی، کوڕەکەیان بە بەڵێنی دامەزراندن لەسەر میلاکی ئەنجومەنی ئاسایشی هەرێمی کوردستان و بە مووچەیەکی مانگانەی 500 هەزار دیناری، لەلایەن کەسێکەوە بەناوی “ئەژی ئەمین” بانگهێشت کراوە بۆ هەولێر. بەڵام لەبری دامەزراندنێکی ئاسایی لە دامەزراوەیەکی فەرمیدا، براوەتە بنکەیەکی سەربازی لە ناوچەی “هەورازە نەفتە” لەسەر ڕێگای هەولێر-کۆیە، کە وەک بنکەیەک بۆ ڕاهێنانی گروپێکی چەکداری تایبەت بەکارهێنراوە.
“فێڵیان لە کوڕەکەمان کرد”
دایک و باوکی ڕێکار بە فرمێسکەوە چیرۆکی ئەو فێڵە گەورەیە دەگێڕنەوە کە لە کوڕەکەیان کراوە. دایکی بە دەنگێکی پڕ لە حەسرەتەوە دەڵێت، “ئەگەر ئێمە و ڕێکار خۆیشی بمانزانیایە بۆ سلێمانی دەنێردرێت بۆ ڕووبەڕووبوونەوەی خەڵک و هێزی خۆمان، نە خۆی دەچوو، نە ئێمەش دەمانهێشت بچێت.” باوکیشی، مام عەبدولڕەزاق، دەڵێت، “کوڕی من بەناوی دامەزراندنەوە بانگکرا، چوزانم بۆ 500 هەزار دینار نێردراوەتە ئەو شوێنە بۆ ئەوەی بە کوشتی بدەن.” قسەی ئەم دایک و باوکە، ڕەهەندێکی مرۆیی تراژیدی دەدات بە ڕووداوەکە و دەیسەلمێنێت کە ڕێکار و هاوڕێکانی قوربانیی یەکەمی ئەم پیلانگێڕییە بوون.
ئامانجی نهێنیی گروپەکە: تێکدانی ئاسایشی سلێمانی
بەپێی ئەو زانیارییانەی کە لە دانپێدانانی بەشێک لە ئەندامانی دەستگیرکراوی گروپەکەدا ئاشکرا کراون، ئامانجی سەرەکیی دروستکردنی ئەم گروپە چەکدارییە، “تێکدانی دۆخی ئەمنیی سلێمانی و ئەنجامدانی کردەوەی تێکدەرانە و هەوڵدان بووە بۆ تیرۆرکردنی بافڵ جەلال تاڵەبانی، سەرۆکی یەکێتیی نیشتمانیی کوردستان.” یەکێک لە ڕێکارە هەرە توندەکان بۆ کۆنترۆڵکردنی ئەم گەنجانە، قەدەغەکردنی مۆبایل و پچڕاندنی هەموو جۆرە پەیوەندییەک بووە لەگەڵ کەسوکاریاندا، تاوەکو نهێنیی ئەرکەکەیان ئاشکرا نەبێت.
بەکارهێنانی تراژیدیاکە؛ ڕەخنە لە “میدیای نابەرپرس”
لە چەند ڕۆژی ڕابردوودا، هەندێک میدیای لۆکاڵی کە خۆیان بە “حیزبی ملیۆنی” دەزانن، بە شێوەیەکی چڕ باسی دۆسیەی گیانلەدەستدانی ڕێکار دەکەن. بەڵام تەرکیزیان تەنها لەسەر چۆنێتیی کوژرانەکەی و سووتانی تەرمەکەیەتی، بەبێ ئەوەی یەک وشە باس لەوە بکەن کە ڕێکار و هاوڕێکانی چۆن فریودران و بۆچی گەیەنرانە ئەو شوێنە. ئەمەش پرسیاری جدی دروست دەکات:
بۆچی باس لە بنکەکەی “هەورازە نەفتە” ناکرێت؟
بۆچی باس لە ڕۆڵی “ئەژی ئەمین” و ئەو کەسایەتییە باڵایەی پشتیوانی دەکات، ناکرێت؟
بۆچی باس لە کارگەی درۆن و ڕاهێنان بە مێردمنداڵان لەو بنکەیەدا ناکرێت؟
ئەم شێوازە لە کاری میدیایی، وەک هەوڵێک بۆ شێواندنی ڕاستییەکان و بەکارهێنانی هەستی خەڵک و تراژیدیای خێزانێکی جەرگسووتاو بۆ مەرامی سیاسی و بانگەشەی هەڵبژاردن لێکدەدرێتەو
