سەرەڕای هەڕەشە و پارە بەخشینەوە، پلانەکەی پارتی شکستیهێنا
عەلی حەمە سەعید-SNN
لەگەڵ ئەوەی ماوەی هەفتەیەك بوو بەرپرسانی بالای پارتی لە هەموو ئاستەكان ئامادەكارییان دەكرد بۆ ئەوەی بتوانن بەهەر نرخێك بێت یاریگای فرانسۆ هەریری پڕبكەن لە خەڵك و وانیشانی بدەن كە ئەمانە دەنگدەری پارتین، بەڵام سەرەڕای بەخشینەوەی پارە و بەكارهێنانی هەڕەشە و فشار نەیتوانی ئەو كارە بكات.
بەگوێرەی بەدواداچوونەكانی SNNماوەی هەفتەیەكی تەواو بوو، ئەندامان و كادیرانی پارتی لە سنوری هەولێر و دەوروبەری ئەكداركرابوون بۆ ئەوەی كاری جدی بكەن بۆ كۆكردنەوەی هاووڵاتیان لە یاریگای فرانسۆ هەریری لە كۆتا بانگەشەی هەڵبژاردنی پارتی لە هەولێر، بۆ ئەو مەبەستەش بەرپرسی ڕێكخرا و بەرپرسی ناوچە و بەرپرسی لقەكان و تەنانەت موختاریی گەڕەك و ئەنجومەنی گوندەكانیش بۆ ئەو كارە ڕاسپاردبوو، چونكە سەرۆك و دوو جێگرەكەی ئەو حزبە ئامادە دەبن.
ئاماژە بەوەشكراوە، هەموو هەوڵەكانی بەرپرسانی پارتی لەماوەی هەفتەی ڕابردوو ئەوەبوو كە بتوانن یاریگای فەرنسۆ هەریری پڕبكەن لەخەڵك، گرنگ نەبوو بەلایانەوە خەڵكی بەنگلادیش یان سۆماڵ و ئەریتریا بن یاخود هاووڵاتی ئاسایی، گرنگ ئەوەیە وا نیشانی سەرۆكی حزب و دوو جێگرەكەی بدرێت یاریگاكە پڕبووە لە دەنگدەری پارتی، بەڵام ئەو پلانەیان سەرینەگرت.
SNNئەوەشی زانیوە، سەرەڕای ئەوەی بڕێكی زۆر پارە بەخشراوەتەوە لە ڕێگەی موختار و بەرپرسی رێكخراو و ناوچە و لقەكانی پارتی بۆ ئەوەی زۆرترین خەڵك ئامادە بێت، بەڵام هێشتا نیوەی یاریگاكە بە بەتاڵی مابوویەوە، ئەوەش سەرۆكی ئەو حزبە و دوو جێگرەكەی بە تەواوی نیگەران كردووە و ترسی خۆیان نەشاردووەتەوە لەوەی ئەم جارە دەنگەكانی پارتی لە ناو هەولێر و سەرجەم ناوچەكانی دیكە كەم دەكات، بۆیە هەرزوو بیانووی ئەوەیان هێنایەوە دەنگدانی ئەمجارە دیزانكراوە، بۆ ئەوەی خەڵك سارد بكەنەوە لە چوونیان بۆ دەنگدان.
