ترەمپ پارەی کاش دەدات بە ئەمریکییەکان

SNN-

دۆناڵد ترەمپ، سەرۆکی ئەمریکا لە پۆستێکیدا، کە لە تۆڕی کۆمەڵایەتی تروس بڵاویکردووەتەوە،  حکومەتی ئەمریکا “پارەی کاش” دەدات بە زۆربەی هاووڵاتییانى ئەمریکا، کە بڕەکەى بەلایەنی کەمەوە دوو هەزار دۆلار دەبێت.

ترەمپ لە پۆستەکەیدا ئاماژەی بەوەدا، تەنها ئەو کەسانە ئەو پارەیان پێنادرێت، داهاتیان زۆرە، بەبێ ئەوەی ئاستی داهات، یان بڕێک پارە دیاری بکات.

ئەم پۆستەی ترەمپ نزیکەی هەفتەیەک دوای ئەوە دێت، دیموکراتەکانى ئەمریکا لە چەندین هەڵبژاردنی ناوخۆیی و ویلایەتەکاندا سەرکەوتنیان لە سەرانسەری وڵاتدا بەدەستهێنا، بەتایبەتی بەدەستهێنانی پۆستی پارێزگاری ویلایەتی نیوجرسی و ڤێرجینیا، لەگەڵ بردنەوەى کورسییەکانی کۆمارییەکان لە لیژنەی خزمەتگوزارییە گشتییەکانی جۆرجیا، کە ویلایەتێکە پشتگیری لە کۆمارییەکان دەکات.

دوای هەڵبژاردنەکە، رەخنەیەکى زۆر لە ترەمپ گیرا و ئاماژە بەوە دەکرێت، ناوبراو وەک پێویست گرنگی بە ژیانى خەڵک نادات، لەکاتێکدا لە هەڵمەتی هەڵبژاردنەکانیدا بەڵێنی دابوو تێچووی ژیانی خەڵک کەمبکاتەوە.