کەشناسی هەرێمی کوردستان: سبەینێ بارانبارین دەستپێدەکات

SNN-

ئاسمانی هەرێمی کوردستان ڕوو لە گۆڕانە و بەپێی پێشبینییەکان، شەپۆلێکی بارانبارین بەرەو ناوچەکە دێت. بەڕێوەبەرایەتیی گشتیی کەشناسی دەڵێت، لە سبەینێوە بارانبارین دەستپێدەکات و چەند ڕۆژێک بەردەوام دەبێت.

شەپۆلەکە کەی دەگات؟
کەشناسیی هەرێم ڕایگەیاندووە، هەر لە ئەمڕۆوە ئاسمان لە نیمچە هەورەوە بۆ هەوری تەواو دەگۆڕێت.

لە کاتەکانی شەودا، نمە باران لە ناوچە شاخاوییەکانی دهۆک دەستپێدەکات و دواتر زۆربەی ناوچەکانی دیکەی هەرێم دەگرێتەوە. لە سبەینێوە کاریگەریی شەپۆلەکە زیاتر دەبێت و لە هەندێک شوێن ئەگەری تاوە باران و بروسکەش هەیە.

بارانبارینەکە تا کەی بەردەوام دەبێت؟

کەشناسیی عێراق پێشبینی دەکات بارانبارینەکە تا ڕۆژانی یەکشەممە و دووشەممەی هەفتەی داهاتوو بەردەوامیی هەبێت.
هاوکات، بەهۆی زیادبوونی خێرایی با، ئەگەری بەرزبوونەوەی تۆز و خۆڵیش هەیە.

پلەکانی گەرما چۆن دەبن؟

بەپێی پێشبینییەکان، نزمترین پلەی گەرما لە حاجی ئۆمەران تۆمار دەکرێت کە 12 پلەی سیلیزییە.
بەرزترین پلەکانی گەرماش لە گەرمیان و کەرکوک دەبن کە لەنێوان 26 بۆ 27 پلەدا دەبن