بافڵ تاڵەبانی: خزمەتکردنی سلێمانی بە کاری لەپێشینەمان دەمێنێتەوە

SNN

بافڵ جەلال تاڵەبانی، سەرۆکی یەکێتیی نیشتمانیی کوردستان، لە پەیامێکدا بەبۆنەی ٢٤١ـەمین ساڵیادی دامەزراندنی شاری سلێمانییەوە، پیرۆزبایی خۆی ئاڕاستە کرد و جەختی لەسەر بەردەوامیی خزمەتکردنی شارەکە کردەوە.

سلێمانی، پایتەختی قوربانیدان و بیری ئازاد

سەرۆکی یەکێتیی نیشتمانیی کوردستان، سلێمانی بە “شاری ھەڵمەت و قوربانی و پایتەختی رۆشنبیری” ناوبرد و ڕایگەیاند: “ئەمڕۆ یادی شارێک دەکەینەوە کە بەدرێژایی مێژوو شانازیی نووسیوەتەوە و پێشەنگی قوربانیدان، بیری ئازاد، رۆشنبیری و نوێگەری بووە.”

پەیام و وەفاداری

لە بەشێکی دیکەی پەیامەکەیدا، بافڵ جەلال تاڵەبانی ئاماژەی بەوەدا کە ئەوان بە شوێنپێی باوباپیرانیاندا هەنگاو دەنێن و وتی: “بەردەوام لەگەڵ خەڵکی دڵسۆزی سلێمانی دەبین و وەفادارین بەرامبەریان.”

بەڵێنی خزمەتکردن بۆ داهاتوویەکی گەشتر

لە کۆتاییدا، سەرۆکی یەکێتیی نیشتمانیی کوردستان دووپاتیکردەوە کە خزمەتکردنی سلێمانی هەمیشە کاری لەپێشینەیان دەبێت و وتیشی: “لەگەڵ خەڵکە خۆشەویستەکەمان پێکەوە هەنگاو بۆ داهاتوویەکی گەشتر دەنێین.”