” کەشێکی تەواو سارد و زستانی دەستپێدەکات”
SNN
بە وتەی شارەزایەکی کەشناسی، گۆڕانکاری بەسەر ئەو شەپۆلەدا دێت کە روودەکاتە هەرێمی کوردستان و بەهێزترە لەوەی چاوەڕێ دەکرا.
ئاراس جەبار شارەزای کەشناسی رایگەیاند: لە ئێوارەی ئەمڕۆ هەینی، کاریگەری سەرەتای شەپۆلی باران بارین لەسەر ناوچەکانمان دەستپێدەکات و سەرەتاش بە نمە باران و چالاکبوونی بای باشووری رۆژهەڵات کاریگەری دەبێت.
ئاماژەی بەوەشکرد: لە کاتەکانی بەیانی سبەی شەممە، لە سەرجەم ناوچەکانمان باران بارین دەستپێدەکات و بە درێژایی کاتەکان ئاسمان هەوری باراناوی دەبێت و هەندێک کاتیش لێزمە باران دەبارێت لەگەڵ چالاکبوونی هەورە بروسکەدا.
راشیگەیاند: پلەکانی گەرماش بەراورد بە ئەمڕۆ شەش تا 10 پلە نزم دەبنەوە و کەشێکی تەواو سارد و زستانی دەستپێدەکات، رۆژی یەکشەممەش شەپۆلێکی دیکە لە دەریای ناوەڕاستەوە دەگات و بەهۆیەوە ئاستی باران بارینەکە چڕتر و زیاتر دەبێت و تا بەیانی رۆژی دووشەممە بەردەوامی دەبێت.
