40 ڕۆژی دیکە خەرجییەکانی عێراق ڕادەگیرێن

SNN-

کاتژمێرەکان نزیکترئەبنەوە بۆ چارەنووسی مووچەی چوار مانگی فەرمانبەرانی هەرێمی کوردستان، لە کاتێکدا تەنها 40 ڕۆژ ماوە بۆ داخستنی ساڵی دارایی عێراق، هێشتا مووچەی مانگی 9 نەنێردراوە و چارەنووسی مووچەکانی مانگی 11 و 12 بە نادیاری ماوەتەوە و پێویستی بە ڕێککەوتنی سیاسیی خێرا هەیە.

بڕیار لەسەر مووچەی مانگی 9 دەدرێت

بەگوێرەی زانیارییەکان، چاوەڕوان دەکرێت لە کۆبوونەوەی ئەم سێشەممەیەی ئەنجومەنی وەزیرانی عێراقدا، بڕیار لەسەر خەرجکردنی مووچەی مانگی ئەیلول (مانگی 9)ـی مووچەخۆرانی هەرێمی کوردستان بدرێت.

ئەگەر ئەم بڕیارە دەربچێت، ئەوا مووچەی مانگی 10ـی هەرێمیش ئەگەری زۆرە تا پێش 25ی کانوونی دووەم خەرج بکرێت.

چارەنووسی مووچەی مانگەکانی 11 و 12 نادیارە

کێشە سەرەکییەکە لە مووچەی مانگەکانی 11 و 12ـدایە. بەگوێرەی یاسا، لە 25ی کانوونی یەکەمی هەموو ساڵێک، سەرجەم خەرجییەکانی حکومەتی فیدراڵی ڕادەگیرێن.

کێشەکە چییە؟ دوای ئەو بەروارە، ناتوانرێت هیچ خەرجییەکی ساڵی 2025 ئەنجام بدرێت.

چارەسەر چییە؟ تەنها ڕێگە ئەوەیە کە پێش داخستنی حیساباتی کۆتایی ساڵ، لە ڕێگەی هەوڵی سیاسی و ڕێککەوتن لەگەڵ بەغدا، بڕیاری خەرجکردنی ئەو دوو مووچەیە دەربکرێت، تەنانەت ئەگەر پارەکەش ساڵی داهاتوو بنێردرێت.

ئەزموونی تاڵی ساڵی پار

ئەمە سیناریۆیەکی نوێ نییە. ساڵی پار مووچەی مانگی 11 لە 17ی کانوونی یەکەمدا نێردرا، بەڵام مووچەی مانگی 12 هەرگیز نەدرا و تا ئێستاش چارەنووسی بە نادیاری ماوەتەوە. ئێستا مەترسیی دووبارەبوونەوەی هەمان سیناریۆ بۆ مووچەکانی کۆتایی ئەمساڵ لە ئارادایە.