وەزارەتی ئەوقاف: مامەڵەی تەواوکردنی حاجیان درێژکرایەوە
حەج
SNN-
وەزارەتی ئەوقاف و کاروباری ئاینیی هەرێمی کوردستان ماوەی تەواوکردنی مامەڵەی حاجییانی بۆ رۆژی دووشەممەی ھەفتەی داھاتوو درێژکردەوە.
وەزارەتی ئەوقاف و کاروباری ئاینیی هەرێمی کوردستان رایگەیاند، لەپێناو بەرژەوەندی گشتی و حاجییان، ماوەی مامەڵەکانیان بۆ رۆژی دووشەممە 8.12.2025 درێژکراوەتەوە.
ئاماژە بەوەشکراوە، ئەو بڕیارە بۆ رەخساندنی دەرفەتی زیاترە بۆ ئەو حاجییانەی کە ناویان لە پڕۆسەکە دەرچووە یان رێنمایی (تنازول) کردن دەیانگرێتەوە، دوای ئەو بەروارە یەدەگەکان شوێنی ئەوانە دەگرنەوە کە نەھاتوون.
بەڕێوەبەرایەتیی حەج و عومرەی هەرێمی کوردستان رایگەیاند: “تیمەکانمان و ستافی بەڕێوەبەرایەتیی گشتیی حەج و عومرە و نووسینگەکانی حەج و عومرە لە رۆژانی یەکشەممەوە لە کاتژمێر 08:30ـی بەیانییەوە تاوەکو کاتژمێر 04:00ـی ئێوارە کاردەکەن، بە مەبەستی خزمەتکردنی حەجخوازان و تەواوکردنی مامەڵەکانیان”.
رۆژی 27ـی تشرینی دووەم، بڕیاربوو دوا وادەبێت بۆ وەرگرتنی مامەڵەی حاجییان، بەڵام بە بڕیاری د.پشتیوان سادق، وەزیری ئەوقاف و کاروباری ئایینی بۆ 4ـی کانوونی یەکەم درێژکرایەوە.
ناونووسین بۆ حەجی 2026 لە 11ـی ئەیلوول دەستیپێکرد و کاتژمێر 12:00ـی شەوی 26ـی ئەیلوولی 2025 کۆتایی هات؛ 89 هەزار و 893 کەس ناویان تۆمار کردبوو.
