وەزارەتی دارایی بڕیاریدا: کرێی وانەبێژی بۆ مامۆستایانی میلاک و گرێبەست زیاد دەکرێت

SNN-

وەزارەتى دارایی و ئابووری ڕێنماییەکی نوێ بڵاودەکاتەوە و نرخی هەر وانەیەک بۆ مامۆستایان دیاری دەکات، بەڵام وەرگرتنی پارەکە مەرجدارە.

ئەوەی پێویستە بیزانیت: ئەمڕۆ یەکشەممە 7ـی کانوونی یەکەمی 2025، وەزارەتی دارایی بەگوێرەی ڕێنمایی ژمارە 17ـی ساڵی 2025، بڕیاریدا کرێی وانەبێژی بۆ مامۆستایانی “گرێبەست و هەمیشەیی”ـی سەر بە وەزارەتی پەروەردە زیاد بکرێت و بۆ هەر وانەیەک بڕی 4,000 دینار دیاری کراوە.

مەرجی وەرگرتنی پارەکە: وەرگرتنی ئەو بڕە پارەیە مەرجدارە؛ بەشێوەیەک دەبێت مامۆستاکە بەگوێرەی سیستمی ساڵی 2009ـی قوتابخانە بنەڕەتی و ئامادەییەکان، بەشەوانەی خۆی (نیساب) تەواو کردبێت، ئینجا پارەی بۆ وانە زیادەکان بۆ خەرج دەکرێت.

کەی جێبەجێ دەکرێت؟: وەزارەتی دارایی دووپاتی کردووەتەوە کە ئەم ڕێنماییە و خەرجکردنی پارەکە، لە سەرەتای دەستپێکردنی ساڵی خوێندنی 2025-2026 دەچێتە بواری جێبەجێکردنەوە.

پێشتر چەند بوو؟: بڕیارەکەی دارایی دوای ئەوە دێت هەفتەی ڕابردوو وەزارەتی پەروەردە ئاشکرای کردبوو، کە پلانیان هەیە کرێی وانەبێژی بۆ مامۆستایانی خۆیان لە 2,000 دینارەوە بۆ 4,000 دینار بەرز بکەنەوە.