” بارانبارین دەست پێدەكاتەوە و بەفریش لە ناوچە شاخاوییەكان دەبارێ”

SNN

شارەزایەكی كەشناسی رایگەیاند، لە رۆژی هەینییەوە بارانبارین دەستپێدەکاتەوە و کاریگەری شەپۆلەکە لە رۆژی شەممەوە درێژتر دەبێتەوە و لە هەندێک ناوچەی شاخاویش بەفر دەبارێت.

ئاراس جەبار، شارەزای كەشناسی، لەبارەی كەشوهەوای ڕۆژانی داهاتوو، ڕایگەیاندووە: “رۆژی هەینی 12/12/2025 لە ئەنجامی چالاکبوونەوەی نزمەپاڵەپەستۆی دەریای ناوەڕاست، شەپۆلێکی مامناوەند و پچڕپچڕی بارانبارین ناوچەکانی هەرێمی کوردستان و بەشێکی ناوچەکانی عێراق دەگرێتەوە، سەرەتاش لە کاتەکانی بەیانیدا لە ڕۆژئاوای عێراقەوە دەست پێدەکات، پاشان لە کاتەکانی دوای نیوەڕۆ بەدواوە سنووری پارێزگای نەینەوا، دهۆک، هەولێر، کەرکووک دەگرێتەوە، لە کاتەکانی شەویشدا بۆ ڕۆژی شەممە 13/12/2025، کاریگەریی ئەو شەپۆلە درێژ دەبێتەوە بۆ سەر ناوچەکانی پارێزگای سلێمانی، هەڵەبجە، ئیدارەی سۆران، ڕاپەرین و گەرمیان.”

وتیشی”تا بەرەبەیانی ڕۆژی یەکشەمە 14/12/2025، کاریگەرییەکانی ئەم شەپۆلە لەسەر ناوچەکانی ڕۆژهەڵاتی هەرێمی كوردستان بەردەوام دەبێت، پلەی گەرماش کەمێک نزمد دەبێتەوە، لە سەنتەری حاجی ئۆمەران و ناوچە شاخاوییە بەرزەکان لە هەزار و 500 مەتر لە ئاستی ڕووی دەریاوە، بەفر دەبارێت، ڕێژەی بارینی بەفرەکە 3 تا 7 سانتیمەتر دەبێت.”

ڕێژەی بارانی پێشبینیکراو لە ماوەی ئەم شەپۆلەدا:

پارێزگای هەولێر و ناوچە شاخاوییەکانی و ئیدارەی سۆران 5 – 10 ملم

پارێزگای سلێمانی و ناوچە شاخاوییەکانی 10 – 20 ملم

پارێزگای دهۆک و ناوچە شاخاوییەکانی و ئیدارەی زاخۆ 5 – 15 ملم

پارێزگای کەرکووک 3 – 7 ملم

پارێزگای هەڵەبجە 5 – 15 ملم

ئیدارەی ڕاپەرین 5 – 15 ملم

ئیدارەی گەرمیان 2 – 7 ملم