سبەی یەکێتی و پارتی کۆدەبنەوە و کابینەی دەیەم تەوەری سەرەکی کۆبوونەوەکەیە

SNN

بڕیارە سبەی سێشەممە، لیژنەی باڵای دانوستانکاری یەکێتیی نیشتمانیی کوردستان و پارتی دیموکراتی کوردستان کۆببنەوە و پرسی پێکهێنانی حکومەتی هەرێمی کوردستان و چوونە بەغداد تاوتوێ بکەن.

تەوەرەکانی کۆبوونەوەکە
بەگوێرەی زانیارییەکانی کەناڵ8، سبەی 16ـی مانگ کۆبوونەوەکە ئەنجام دەدرێت. تەوەری سەرەکیی گفتوگۆکان تایبەت دەبێت بە هەنگاوەکانی پێکهێنانی کابینەی دەیەمی حکومەتی هەرێمی کوردستان و هەروەها پرسی پێکهێنانی کابینەی نوێی حکومەتی عێراق.

هەڵوێستی یەکێتی بۆ ڕێککەوتن
سەرچاوەیەک لە یەکێتیی نیشتمانیی کوردستان دووپاتی کردووەتەوە، کە حزبەکەی هەموو کات ئامادە بووە بۆ گەیشتن بە ڕێککەوتن، بەڵام جەخت لەوە دەکاتەوە کە دەبێت لەسەر بنەمای “ئیستحقاقی هەڵبژاردن” بێت.

لەبارەى پرسی بەغداد و دروستکردنی هاوپەیمانیی هاوبەشیش، ئەو سەرچاوەیە بۆ کەناڵ8 ئاشکرای کردکە یەکێتی ئامادەیی تەواوی هەیە بۆ ڕێککەوتن لەبارەی پرسە عێراقییەکان.

پێکهاتەی شاندی دانوستانکار
بەگوێرەى کۆبوونەوەکانی پێشوو، چاوەڕوان دەکرێت پێکهاتەی شاندی هەردوولا بەم شێوەیە بێت:

شاندی یەکێتی: بە سەرۆکایەتی قوباد تاڵەبانی و ئەندامێتی (دەرباز کۆسرەت ڕەسوڵ ، ڕێواس فایەق و ئامانج ڕەحیم ).

شاندی پارتی: بە سەرۆکایەتی هۆشیار زێباری و ئەندامێتی (پشتیوان سادق و دڵشاد شەهاب).