کەشناسی هەرێم: ئەگەری بەفربارین هەیە

SNN

کەشناسی هەرێم لە راگەیەنراوێکدا ئاشکرایکرد، ئێوارەی ئەمڕۆ لە بەشێک لە ناوچە جیاوازەکانی هەرێم باران دەبارێت و لە چیا بەرزەکانیش ئەگەری بەفربارین هەیە.

ئەمڕۆ سێشەممە 16ی کانوونی یەکەم، کەشناسی هەرێم ڕایگەیاند، ئەمڕۆ لە چەند ناوچەیەکی هەرێم ئەگەری بارینی نمەباران و لە چیا بەرزەکانیش ئەگەری بەفربارین هەیە.

کەشناسی هەرێم دەشڵێت، لە سنووری پارێزگای سلێمانی ئاسمانی نیمچە هەور دەبێت بە درێژای کاتەکان، لە سنووری پارێزگای هەولێر تاکاتەکانی نیوەڕۆ تەم دەبێت، پاشان لەگەڵ هاتنی کاریگەری نزمە پاڵە پەستۆیەکی لاوازی دەریای ناوەڕاست بۆ سەر سنووری پارێزگای دهۆک کەشی ئەو پارێزگایە و ناوچە شاخاوییەکانی بەردەوام هەور دەبێت لەگەڵ نمە بارانی کەم و بارینی بەفر لە سەر ناوچە شاخاوییە بەرزەکان، کاریگەری ئەو نزمە پاڵە پەستۆیە ڕوو لە ناوچە شاخاوییە سنورییەکان و ناوچە شاخاوییە بەرزەکانی سنووری پارێزگای هەولێر دەکات بەردەوام دەبێت تا کاتەکانی شەو.

ئاماژەی بەوەشکردووە، لەگەڵ کاریگەری ئەم بەفر و باران بارینەی هەیە، لەسەر بەشێک لە شنگال و شاخی شنگال لە بەرزی 1400 م ئەگەری بەفر بارین هەیە، هاوکات پلەکانی گەرما کەمێک نزم دەبێتەوە بەراورد بە تۆمارکراوەکانی دوێنێ.