سودانی بۆ بافڵ تاڵەبانی: جەخت لە پاراستنی مافی مووچەخۆرانی هەرێم دەکەینەوە

SNN

بافڵ جەلال تاڵەبانی، سەرۆکی یەکێتیی نیشتمانیی کوردستان، لە بەغدا لەگەڵ محەمەد شیاع سودانی، سەرۆکوەزیرانی عێراق کۆبووەوە و پرسی مووچەی مووچەخۆرانی هەرێمی کوردستانیان تاوتوێ کرد.

پێکهێنانی حکومەت

لە کۆبوونەوەکەدا، کە نزار ئامێدی، ئەندامی مەکتەبی سیاسیی یەکێتی و دکتۆر خالید شوانی، وەزیری دادی عێراق ئامادەیبوون، جەخت لە یەکخستنی هەوڵەکان کرایەوە بۆ پێکهێنانی حکومەتێکی بەهێز کە دیدگای خزمەتکردنی خەڵک و بەهێزکردنی پایەکانی دەوڵەتداری بێت.

پرسی مووچە

بافڵ جەلال تاڵەبانی داوای لە محەمەد شیاع سودانی کرد کە پەلە بکرێت لە ناردنی مووچە و مافی مووچەخۆرانی هەرێمی کوردستان پارێزراو بێت. لە بەرامبەردا، سەرۆکوەزیرانی عێراق پابەندبوونی خۆی بە ڕێککەوتنەکان دووپاتکردەوە و وتی: “جەخت لە پاراستنی مافی مووچەخۆرانی هەرێمی کوردستان دەکەینەوە.”