هۆشداریی لەبارەی کەشوهەواوە دەدرێت و هەوری سوپەرسێڵ بەڕێوەیە

SNN

شارەزایەکی کەشناسی رایدەگەیەنێت، شەپۆلێکی بەفر و باران روو لە هەرێمی کوردستان دەکات و سەرەتا شەپۆلەکە مامناوەند دەبێت دواتر دەگۆڕێت بۆ شەپۆلێکی بەفر و بارانی بە‌هێز.

هەڤاڵ سدیق گەڵۆزی شارەزای كەشناسی  رایگەیاند، لە 28ـی كانوونی یەكەم،  شەپۆلێكی باران و بەفر ڕوو لە هەرێمی كوردستان دەكات، لە قۆناغی یەكەمدا شەپۆلەكە لە شەپۆلێكی بەفر و بارانی مامناوەند گۆڕاوە بۆ شەپۆلێكی بەفر و بارانبارینی بەهێز.

ئاماژەی بەوەکردووە، ئەو شەپۆلە بۆ تەواوی ناوچە جیاوازەكانی هەرێمی كوردستان جێگیر بووە، داوا لەلایەنە پێوەندارەكانی دەكەم ئامادەكاری بكەن بۆ هەر ڕووداوێكی نەخوازراو، چونكە ئەگەری هەیە بەهۆی دابەزینی زیاتری پەستانی هەوا و دروستبوونی بارستە هەوری زەبەلاح كە بە هەوری سوپەرسێڵ ناسراوە، تاوەبارانی خێرا و بەلێزمە لە هەندێ كاتدا بەشێك لە ناوچەكانی هەرێم بگرێتەوە.

جەختیکردەوە، پێشبینی دەكرێت لە هەندێك ناوچە 200 ملم باران ببارێت، ببێتە هۆی بەرزبوونەوەی ئاستی ئاو و دروستبوونی لافاو.

هاوکات، بەڕێوەبەرایەتی گشتی کەشناسی و بوومەلەرزەزانی هەرێمی کوردستانیش ڕایگەیاند، ئەمڕۆ چوارشەممە، ئاسمان لە سنووری پارێزگای هەولێرو دهۆک نیمچە هەور و پەڵە هەور دەبێت، بەڵام لە سنووری پارێزگاکانی سلێمانی و هەڵەبجە وکەرکووک و ئیدارەی گەرمیان و ئیدارەی ڕاپەڕین نمەبارانی پچر پچر بەردەوام دەبێت و لە دوای نیوەرۆوە کەشەکە ئاسایی دەبێتەوە.

سەبارەت بە سبەینێش ئاشکرایکردووە، ئاسمان ساماڵ و پەڵە هەور و هەندێک کات نیمچە هەور دەبێت و پلەی گەرماش لە تۆمارکراوەکانی ئەمڕۆ نزیک دەبێتەوە.

بەرزترین پلەکانی گەرمای پێشبینیکراو بە پلەی سیلیزی

هەولێر : 15 پلەی سیلیزی

سلێمانی : 13 پلەی سیلیزی

دهۆک : 16 پلەی سیلیزی

زاخۆ :16 پلەی سیلیزی

کەرکوک : 16 پلەی سیلیزی

هەڵەبجە : 12 پلەی سیلیزی

سۆران: 11 پلەی سیلیزی

گەرمیان : 18 پلەی سیلیزی