پۆلیسی ڕاپەڕین: دزەکانی ڕانیە دەستگیرکران

SNN

بەڕێوەبەرایەتی پۆلیسی ئیدارەی ڕاپەڕین ئاشکرایکرد، کە ئەو دوو کەسەی بە بەردەوامی دزییان لە خوێندنگەیەکی ڕانیە دەکرد لەلایەن بەڕێوەبەرایەتی نەهێشتنی تاوانی ڕانیەوە دەستگیرکران.

بەپێی ڕاگەیەندراوی بەڕێوەبەرایەتی پۆلیسی ڕاپەڕین، دوای ئەوەی هاووڵاتیەک لە 18ی ئەم مانگە سەردانی نووسینگەی نەهێشتنی تاوانی ڕانیەی کرد و سکاڵای تۆمارکرد کە بەوتەی خۆی “لە فرۆشگای خوێندنگەی سەفین و ڕاپەڕین دزی لێ کراوە پارەیەکی زۆر و خواردنی فرۆشگاکەیان لێ دزیووە”، بەشی پۆلیسی نەهێشتنی تاوانی ڕاپەڕین بە هاوڪاری بەشی پۆلیسی فریاڪەوتنی ڕاپەڕین دوو تۆمەتباری دەستگیرکرد و لەکاتی لێکۆڵینەوە لەگەڵیاندا دانیان ناوە بە تاوانەکەیاندا و بە وتەی خۆیان “لە مانگی ئەیلوولی ساڵی 2023 تا 20ی ئەم مانگە، بە کاتی جیاجیا بەڕێـــژەیــەکــی زۆر کــە نەتوانراوە هـەژمــار بکرێت دزیــان لەفرۆشگای ناوبراو کردووە و پارەیەکی زۆر و خواردنی فرۆشگاکە یان دزیووە”.

باسی لەوەشکردووە: نەهێشتنی تاوانی ڕانیە ناسنامەی تۆمەتبارەکانی ئاشکرا کردووە بەناوەکانی (ئـ.ر.هـ) و (ئـ.ح.أ) یەکێکیان نەوجەوانە و ئەوەی تریان تەمەنی لەسەرووی 18 ساڵەوەیە هەردووکیان لە ڕەگەزی نێرن، بۆیە بە بڕیاری دادوەر و بە ماددەی 443 لە یاسایی سزادانی عێراقی تۆمەتباران ڕاگیران و، لێکۆڵینەوەش لەسەر ڕووداوەکە بەردەوامە.