“لەم کاتەدا بەفر لە سەنتەری شاری سلێمانی دەبارێت”

SNN-

پشتیوان پێنجوێنی، شارەزای بواری کەشناسی بە SNNـی راگەیاند، لەماوەی نیوەڕۆ بۆ کاتژمێر 9ـی سبەینێ شەوی یەکشەممە لەسەر دووشەممە، لە سەنتەری شاری سلێمانی هەندێک کات باران و بەفر بە تێکەڵی دەبارێت و ئەگەرێکی بەهێزە بەفری تەواویش ببارێت، بە هۆکاری زووگەیشتنی سەرما بەهێزەکە.

ئاماژەی بەوەشکرد، لە ناوچەی جیاجیاش، ئەگەری روودانی لافاو هەیە و دەبێت حکومەت و لایەنی پەیوەندیدار ئامادەکاری بکەن بۆ رووبەڕووبوونەوەی هەر حاڵەتێکی نەخوازراو.

هاوکات، بەپێی ڕاپۆرتی بەڕێوەبەرایەتی کەشناسی هەرێم، ئەمڕۆ شەممە، ئاسمان بەگشتی هەوری باراناوی دەبێت، نمە باران و بارانی مامناوەند لە زۆربەی کاتەکاندا دەبارێت، لە ناوچە سنووریەکان و ناوچە شاخاویە بەرزەکان بەفر بارین بەردەوامی هەیە، پێشبینی دەکرێت لە ناوچە نیمچە بەرزەکان تێکەڵەی باران و وردە بەفر (کڕێوە) ببارێت.

کەشناسی باسی لەوەشکردووە، پلەکانی گەرما بەگشتی نزم دەبێتەوە بە دوو بۆ پێنج پلە بەراورد بە تۆمارکراوەکانی دوێنێ و سبەینێ یەکشەممە، ئاسمان هەوری باراناوی دەبێت، بارانی مامناوەند لە هەموو ناوچەکاندا دەبارێت لە هەندێ کات و شوێن رێژەی دابارین زیاد دەکات بە تایبەت لە ناوچە شاخاوییەکان و ناوچەکانی رۆژهەڵاتی هەرێم، بەفر بارین بەردەوام دەبێت لە ناوچە سنووریەکان و ناوچە شاخاویە بەرزەکان، پێشبینی دەکرێت لە ناوچە نیمچە بەرزەکان تێکەڵی باران و وردە بەفر (کڕێوە) ببارێت.