بەڕێوەبەرایەتیی گشتیی بەنداو و کۆگاکانی ئاو: 100ملیۆن مەتر سێجا ئاو زیادیکردووە

SNN-

بەڕێوەبەرایەتیی گشتیی بەنداو و کۆگاکانی ئاو لە هەرێمی کوردستان ئاماری کاریگەریی دوایین شەپۆلی بارانبارین و لافاوی بڵاوکردەوە و ڕایگەیاند، بەڕێژەیەکی بەرچاو داهاتی ئاو لە سەرچاوەکانەوە زیادیان کردووە و ئاستی کۆگاکردنی ئاو لە بەنداوەکان بەرزبووەتەوە.

ئاماری بەرزبوونەوەی ئاستی ئاوی بەنداوە گەورەکان

بەگوێرەی داتاکانی بەڕێوەبەرایەتییەکە، تەنیا لە ماوەی 24 کاتژمێری ڕابردوودا و بە کاریگەریی ئەم شەپۆلە، لە هەردوو بەنداوی دوکان و دەربەندیخان زیاتر لە 100 ملیۆن مەتر سێجا داهاتی ئاو کۆگاکراوە. لەسەر ئاستی بەرزیی ئاویش، ئاستی ئاوی بەنداوی دوکان 85 سانتیمەتر و بەنداوی دەربەندیخان 60 سانتیمەتر بەرزبووەتەوە، هاوکات لە بەنداوی گۆمەسپان ئاستی ئاو 60 سانتیمەتر و لە بەنداوی دهۆکیش 16 سانتیمەتر زیادی کردووە.

دۆخی بەنداوە بچووکەکان و پڕبوونیان

سەبارەت بە بەنداوە بچووکەکانی سنووری گەرمیان، سلێمانی، هەولێر و دهۆک، بەڕێوەبەرایەتییەکە دڵنیایی داوە کە سەرجەمیان بە سەلامەتی شەپۆلی لافاوەکەیان تێپەڕاندووە. زۆربەی ئەو بەنداوە بچووکانە پڕبوون لە ئاو و ئەوانی دیکەشیان بڕێکی زۆر ئاویان تێدا کۆگاکراوە و ئاستیان بەرزبووەتەوە.

پێشوازی لە ساڵی نوێ بە دۆخێکی ئاویی باشەوە

بەڕێوەبەرایەتیی گشتیی بەنداوەکان ئاماژەی بەوە کردووە کە کاریگەریی ئەم شەپۆلە بۆ ڕۆژانی داهاتووش بەردەوام دەبێت و داهاتی ئاو بۆ بەنداوە گەورەکان زیاتر دەکات. بەمەش هەرێمی کوردستان بە کەشێکی تەڕ و دۆخێکی باشی ئاوییەوە پێ دەنێتە ساڵی نوێوە.