بافڵ جەلال تاڵەبانی: پێویستە توندوتیژی دژی کوردانی ڕۆژئاوا ڕابگیرێت

SNN

بافڵ جەلال تاڵەبانی، سەرۆکی یەکێتیی نیشتمانیی کوردستان، لە ماڵی مام لە بەغداد، پێشوازیی لە ڕەیان کلدانی، ئەمینداری گشتیی بزووتنەوەی بابلیۆن و شاندێکی یاوەری کرد.

تاوتوێکردنی دۆخی ڕۆژئاوای کوردستان

لە دیدارەکەدا، کە ژمارەیەک لە ئەندامانی باڵای مەکتەبی سیاسیی یەکێتی ئامادەیبوون، بە وردی دۆخی سیاسیی ناوچەکە و ئاڵۆزییەکانی ئەم دواییەی سووریا و ڕۆژئاوای کوردستان خرایەبەر باس.

لەمبارەیەوە، بافڵ جەلال تاڵەبانی هەڵوێستی یەکێتیی خستەڕوو و ڕایگەیاند: “دەبێت ڕێز لە مافی هەموو نەتەوە و پێکهاتەکانی سووریا بگیرێت و توندوتیژیی دژی کوردانی ڕۆژئاوا ڕابگیرێت و هەمووان بگەڕێنەوە بۆ مێزی گفتوگۆکان.”

پێکهێنانی حکومەتی نوێی عێراق

سەبارەت بە پرسی پێکهێنانی حکومەتی نوێی عێراق، هەردوولا جەختیان لە پابەندبوون بە وادە یاساییەکان و بنەما دەستوورییەکان کردەوە وەک تاکە ڕێگە بۆ پێکهێنانی حکومەتێکی بەهێز و خزمەتگوزار.