هەسەدە: دیمەشق پێشێلی ڕێککەوتنی کردووە و دۆخێکی مەترسیدار دروستبووە

SNN-

هێزەکانی سوریای دیموکرات (هەسەدە) هۆشداری دەدەن لە لێکەوتە مەترسیدارەکانی چوونی سوپای سووریا بۆ ناو دێرحافر و مەسکەنە پێش تەواوبوونی کشانەوەی هێزەکانیان و داوای دەستێوەردانی بەپەلەی نێودەوڵەتی دەکەن.

پێشێلکردنی خاڵەکانی ڕێککەوتنەکە

ناوەندی ڕاگەیاندنی هێزەکانی سوریای دیموکرات ڕایگەیاند، هێزەکانی حکومەتی دیمەشق پێشێلی ئەو ڕێککەوتنەیان کردووە کە بە سەرپەرشتی نێودەوڵەتی بۆ کشانەوەی هێزەکانیان لە دێرحافر و مەسکەنە ئەنجامدراوە. بەپێی ڕاگەیێنراوەکە، بڕیار وابووە هێزەکانی دیمەشق تەنیا پاش تەواوبوونی پڕۆسەی کشانەوەکە بێنە ناو ئەو شارانە، بەڵام دیمەشق پابەندی ئەو خاڵە نەبووە و ڕێککەوتنەکەی شکاندووە.

مەترسیی پێکدادان و لێکەوتەکان

هەسەدە ئاماژەی بەوە کردووە کە هێزەکانی دیمەشق پێش ئەوەی کشانەوەی شەڕڤانان بە تەواوەتی کۆتایی بێت، چوونەتە ناو شارەکەوە. ئەم هەنگاوە بە وتەی هەسەدە “دۆخێکی زۆر مەترسیدار”ی دروستکردووە کە ئەگەری هەیە لێکەوتەی خراپی لێ بکەوێتەوە. هەسەدە هۆشداری دەدات کە ئەم جۆرە پێشێلکارییانە دەبنە هۆی ئاڵۆزبوونی زیاتری بارودۆخە مەیدانییەکە و دروستبوونی گرژیی نوێ.

داوای دەستێوەردانی نێودەوڵەتی

هێزەکانی سوریای دیموکرات داوای لەو وڵات و لایەنە نێودەوڵەتییانە کرد کە چاودێری ڕێککەوتنەکە دەکەن، بە پەلە دەستێوەردان بکەن. هەسەدە جەختی کردەوە کە پێویستە لایەنە چاودێرەکان گرەنتییەک بۆ پابەندبوون بە خاڵەکانی ڕێککەوتنەکە دابین بکەن تاوەکو ڕێگری لە هەر جۆرە پێکدادانێکی نەخوازراو لە نێوان هەردوولادا بگیرێت و ئاسایش بپارێزرێت.

پێشڕەوییەکانی سوپای سوریا

ئەم هۆشدارییەی هەسەدە لە کاتێکدایە کە سوپای عەرەبیی سووریا بە فەرمی کۆنتڕۆڵکردنی تەواوەتیی شاری دێرحافری ڕاگەیاندووە. هاوکات سوپای سووریا جوڵە سەربازییەکانی بە ئاڕاستەی شاری مەسکەنە و ناوچەی دەبسی عەفنان دەستپێکردووە بە مەبەستی سەپاندنی دەسەڵاتی خۆی بەسەر ئەو ناوچانەی پێشتر لەژێر کۆنتڕۆڵی هەسەدەدا بوون.