شیروان میرزا بۆ SNN: پێویستە لە ئێستاوە گەرەنتی 12 مووچەی ساڵی 2026 بکرێت

SNN-

شیروان میرزا، ئەندامی خولی پێشووی ئەنجومەنی نوێنەرانی عێراق، لە لێدوانێکیدا بۆ SNN، تیشکی خستە سەر چارەنووسی مووچەی فەرمانبەرانی هەرێم و هۆشداریدا لە دووبارەبوونەوەی سیناریۆی “فەوتانی مووچە” لە کۆتایی ساڵدا.

کارکردن بە سیستەمی (1/12)

ناوبراو ئاماژەی بەوە کرد کە بەپێی “یاسای کارگێڕی دارایی”، کاتێک ساڵی نوێ دەست پێ دەکات و یاسای بودجە نییە، کار بە سیستەمی یەک لەسەر دوازدە (1/12) دەکرێت. ڕوونیکردەوە: “ئەگەر لە ساڵی 2025دا 10 مووچە بۆ هەرێم نێردرابێت، بۆ ئەمساڵیش ناردنی ئەو 10 مووچەیە مسۆگەرە.”

پشتبەستن بە بڕیارەکانی دادگای فیدراڵی

شیروان میرزا جەختی لەوە کردەوە کە بڕیارێکی دادگای فیدراڵی هەیە کە ڕێگری دەکات لەوەی مووچە بکرێتە قوربانی ململانێ سیاسییەکان. وتیشی: “پێویستە لایەنی کوردی لە ئێستاوە خەمی ئەم پرسە بخوات، نەک بگەینە مانگی 11 و 12 و ئینجا باس لە فەوتانی ئەو دوو مووچەیە بکەین.”

داواکاری بۆ ڕێککەوتن لەگەڵ کابینەی نوێ

ئەو پەرلەمانتارەی پێشوو داوا دەکات کە:

– زامنکردنی مووچە: لەگەڵ دەستبەکاربوونی حکومەت و سەرۆک وەزیرانی نوێی عێراق، پێویستە شەڕی زامنکردنی هەموو مووچەکان بکرێت.
– ڕێگری لە دووبارەبوونەوە: دەبێت ڕێککەوتنێک بکرێت کە لە ساڵی 2026دا جارێکی تر پرسی “فەوتانی دوو مووچە” دووبارە نەبێتەوە.
– چارەسەری یاسایی: بەهۆی هەبوونی یاسای بودجە و بڕیاری دادگای فیدراڵی، ئەگەر هەوڵی جدی هەبێت، ئەم کێشەیە بە ئاسانی چارەسەر دەکرێت.