بەڕێوەبەرایەتیی خۆسەر: شەڕی مان و نەمانمان لەپێشە و پێویستە هەمووان چەک هەڵبگرن

SNN

بەڕێوەبەرایەتیی خۆسەری لە هەرێمی باکوور و ڕۆژهەڵاتی سووریا ڕایگەیاند، لە ڕۆژی ڕابردووەوە گرووپەکانی سەربە حکومەتی کاربەڕێکەری دیمەشق چەند جارێک ڕێککەوتنیان پێشێلکردووە و لە چەند بەرەیەکەوە هێرشیان کردووەتەسەر هێزەکانیان. ئاماژە بەوەش کراوە، سەرەڕای هەموو هەوڵەکان بۆ دۆزینەوەی چارەسەری ئاشتییانە و پیشاندانی نیازپاکی لە ڕێگەی کشانەوە لە چەند ناوچەیەک، بەڵام دیمەشق سوورە لەسەر بەردەوامیدان بە شەڕ و بژاردەی سەربازی.

قۆناغێکی یەکلاکەرەوە

بەپێی ڕاگەیێندراوی بەڕێوەبەرایەتیی خۆسەر، ئێستا ناوچەکە لەبەردەم قۆناغێکی یەکلاکەرەوەدایە، کە تێیدا بژاردەکان بریتین لە بەرگری و ژیان بە کەرامەتەوە، یاخود ڕووبەڕووبوونەوەی زوڵم و سووکایەتی. لەو چوارچێوەیەشدا داوا لە گەل کراوە لە ئەوپەڕی ئامادەباشیدا بن، بەرگری لە خۆیان و شارەکانیان بکەن و لە پاڵ هێزە سەربازییەکاندا بمێننەوە بۆ بەشداری لە “شەڕی کەرامەت”.

بانگەواز بۆ چەکهەڵگرتنی گشتی

بەڕێوەبەرایەتیی خۆسەر داواى لە سەرجەم چین و توێژەکان کردووە چەک هەڵبگرن و لە ئامادەباشیدا بن بۆ بەرەنگاربوونەوەی هەر هێرشێک لە ناوچەکانی جزیرە و کۆبانێ. جەخت لەوەش کراوەتەوە کە ئەوان لەبەردەم شەڕی “مان و نەمان”دان و تاکە ڕێگەش بۆ پاراستنی سەروەری و ناسنامەیان، تەنیا بەرگریی گەلە.

ئامانجی هێرشەکان و تێکدانی برایەتی پێکهاتەکان

لە ڕاگەیێندراوەکەدا ئاماژە بەوە دراوە، ئامانجی ئەم هێرشانە لێدانە لەو برایەتییەی بە خوێنی کوڕ و کچان هاتووەتەدی و هەوڵێکە بۆ هەڵگیرسانی فیتنە و توندوتیژی لە نێوان پێکهاتەکانی باکوور و ڕۆژهەڵاتی سووریا. هەروەها جەخت کراوەتەوە کە ئەمە بەئامانجگرتنی پێکهاتە ڕەسەنەکانی سووریایە لەلایەن لایەنێکەوە کە دەیەوێت وڵاتەکە لە فرەڕەنگییەوە بکاتە یەک ڕەنگ.