نێچیرڤان بارزانی: شەڕی سوریا مەترسیی سەرهەڵدانەوەی داعش دەهێنێتە ئاراوە

SNN-

نێچیرڤان بارزانی، سەرۆکی هەرێمی کوردستان، لە ڕاگەیەندراوێکدا نیگەرانیی قووڵی خۆی لەبارەی بەردەوامیی پێکدادانە سەربازییەکانی نێوان سوپای سوریا و هێزەکانی سوریای دیموکرات (هەسەدە) دەربڕی. سەرۆکی هەرێم هۆشداری دەدات کە ئەم دۆخە مەترسیی سەرهەڵدانەوەی داعش دەهێنێتە ئاراوە و داوا لە هاوپەیمانیی نێودەوڵەتی دەکات ئەرکی خۆی جێبەجێ بکات.

هەڕەشە لەسەر سەقامگیری و سەرهەڵدانەوەی داعش

سەرۆکی هەرێمی کوردستان لە پەیامەکەیدا ڕایگەیاند: “بەردەوامیی شەڕ و پێکدادان هەڕەشەیەکی جددی لەسەر ئارامی و سەقامگیریی سوریا و ناوچەکە بەگشتی دروست دەکات و مەترسیی سەرهەڵدانەوەی داعش دەهێنێتەوە ئاراوە.”

هەوڵە دیپلۆماسییەکان و ڕەتکردنەوەی بژاردەی سەربازی

نێچیرڤان بارزانی ئاشکرایکرد کە هەر لە سەرەتای دروستبوونی ئاڵۆزییەکانەوە، بەردەوام لەگەڵ لایەنە هەرێمی و نێودەوڵەتییەکاندا لە پەیوەندیدا بوون بۆ ڕاگرتنی شەڕ و گرتنەبەری گفتوگۆ. جەختی لەوەشکردەوە: “دووپاتی دەکەینەوە کە شەڕ و ڕووبەڕووبوونەوەی سەربازی، هیچ کێشەیەک چارەسەر ناکات و دۆخەکە ئاڵۆزتر دەکات.”

بانگەوازێک بۆ هاوپەیمانان و مسۆگەرکردنی مافەکان

سەرۆکی هەرێمی کوردستان داوای لە هاوپەیمانیی نێودەوڵەتی کرد کە “ئەرکی خۆی لە پاراستنی سەقامگیری و ڕێگری لە سەرهەڵدانەوەی داعش جێبەجێ بکات.” هاوکات، ئامادەیی هەرێمی کوردستانی بۆ پێشکەشکردنی هەموو هاوکاری و یارمەتییەک دەربڕی بەمەبەستی ڕاگرتنی شەڕ و گەیشتن بە ئاگربەست.

لە کۆتاییدا، جەختی لەوە کردەوە کە “پێویستە مافی کورد و تەواوی پێکهاتەکان لە سووریا پارێزراو بن و لە دەستوور داهاتووی سوریادا مسۆگەر بکرێن.