خوێندکارانی زانکۆی گەشەپێدان هەڕەشەی بایکۆت دەکەن؛ مۆڵەتی 48 کاتژمێری دەدەنە عەلی قەرەداغی

SNN-

خوێندکارانی زانکۆی گەشەپێدانی مرۆیی، لە بەیاننامەیەکدا، تووڕەیی و ناڕەزایەتیی توندی خۆیان بەرامبەر هەڵوێست و قسەکانی ئەم دواییەی دکتۆر عەلی قەرەداغی، خاوەنی زانکۆکەیان دەربڕی. خوێندکاران مۆڵەتی 48 کاتژمێرییان داوەتە ناوبراو بۆ پاشگەزبوونەوە و داوای لێبووردنکردن، بەپێچەوانەوە هەڕەشەی بایکۆتکردنی خوێندن دەکەن.

ئیدانەکردنی قسەکانی عەلی قەرەداغی

لە بەیاننامەکەدا، کە بەناوی زیاتر لە 2000 خوێندکارەوە دەرچووە، هاتووە دەڵێن: “ئێمە وەک خوێندکارانی زانکۆی گەشەپێدانی مرۆیی ئەوپەڕی تووڕەیی و ناڕەزایی خۆمان بەرامبەر هەڵوێست و قسەکانی دکتۆر عەلی قەرەداغی ڕادەگەیەنین.” خوێندکاران ڕایانگەیاندووە کە پێشتر ناڕازی بوون لە بێهەڵوێستییەکانی، بەڵام “بەداخەوە کار گەیشتە دژایەتی و وەستانەوەی عەلی قەرەداغی بەرامبەر نەتەوەکەی خۆی.”

مۆڵەتی 48 کاتژمێری و هەڕەشەی بایکۆت

خوێندکاران مۆڵەتی 48 کاتژمێریان داوەتە دکتۆر عەلی قەرەداغی تا “پاشگەز ببنەوە لە هەڵوێستەکانیان و ڕوونکردنەوە بدەن لەسەر قسەکانیان و داوای لێبووردن بکەن.” لە کۆتایی بەیاننامەکەدا هۆشدارییان داوە و دەڵێن: “بە پێچەوانەوە، بایکۆتی خوێندن لە زانکۆکە دەکەین و ڕێگا نادەین هیچ وانەیەک لەم شوێنە بوترێتەوە.