وەزارەتی دارایی: ئەم هەفتەیە لیستی مووچە ڕەوانەی بەغدا دەکرێت و هیچ گرفتێک لەبەردەم ناردنی مووچەدا نییە

SNN-

سەرچاوەیەک لە وەزارەتی دارایی و ئابووریی حکومەتی هەرێمی کوردستان ڕایگەیاند، بڕیارە لەم هەفتەیەدا لیستی مووچەی مانگی 1ـی فەرمانبەران ڕەوانەی بەغدا بکرێت. وەزارەت دڵنیایی دەدات کە پڕۆسەکە بەبێ گرفت بەڕێوەدەچێت و ئامادەکارییە تەکنیکییەکان بۆ ڕەوانەکردنی لیستەکە کۆتاییان هاتووە.

دابینکردنی 120 ملیار دیناری داهاتی نانەوتی بۆ حکومەتی فیدراڵ

سەبارەت بە شایستە داراییەکانی بەغدا لای هەرێم، سەرچاوەکە ئاماژەی بەوە کرد کە تاوەکو ئێستا بڕی 120 ملیار دیناری داهاتی نانەوتی ئامادە نییە، بەڵام هاوشێوەی مانگەکانی ساڵی ڕابردوو، پاش پەسەندکردنی لیستی مووچە لەلایەن بەغداوە، ئەو بڕە پارەیە ئامادە دەکرێت. بڕیارە 48 ملیار دیناری ئەو پارەیە لە سلێمانی و بڕەکەی دیکە لە هەولێر و دهۆک کۆبکرێتەوە و بخرێتە سەر هەژماری وەزارەتی دارایی عێراق.

گفتوگۆکان لەبارەی چارەنووسی مووچە نەنێردراوەکانی سێ ساڵی ڕابردوو

سەرچاوەکەی وەزارەتی دارایی جەختی کردەوە کە هیچ ئاستەنگێک لەبەردەم مووچەی مانگی 1ـی ساڵی 2026دا نییە. هاوکات ئاشکرای کرد کە لە ئێستادا حکومەتی هەرێمی کوردستان لەگەڵ بەغدا لە گفتوگۆدایە بۆ دۆزینەوەی ڕێگەیەک و دیاریکردنی چارەنووسی ئەو مووچانەی کە لە ماوەی 3 ساڵی ڕابردوودا بەهۆی جیاوازەوە بۆ هەرێمی کوردستان نەنێردراون.