SNN-
بەپێی ڕاپۆرتێکی کەناڵی (i24NEWS)ی ئیسرائیلی کە پشت بە سەرچاوەیەکی نزیک لە ئەحمەد شەرع، سەرۆکی سوریا دەبەستێت، هەردوو وڵاتی وریا و ئیسرائیل بە نێوەندگیرییەکی چڕی ئەمریکا لە لێواری واژۆکردنی ڕێککەوتنێکی ئەمنی و دیپلۆماسیی گەورەدان.
وردەکارییەکان بەپێی سەرچاوە میدیاییەکە:
* پرۆژەی “پارکی ئاشتی” لە جۆلان: سەرچاوەکە ئاشکرای کردووە کە حکومەتەکەی ئەحمەد شەرع پێشنیازێکی “مامناوەند”ی داوە بۆ چارەسەری کێشەی جۆلان، ئەویش بەکرێدانی بەرزاییەکانی جۆلانە بە ئیسرائیل بۆ ماوەی ٢٥ ساڵ، بە مەبەستی ئەنجامدانی پڕۆژەی ئابووری هاوبەش.
* کردنەوەی باڵیۆزخانە: هەمان سەرچاوە ئاماژەی بەوە کردووە کە گەشبینییەکی زۆر هەیە پێش کۆتایی ئەمساڵ باڵیۆزخانەی ئیسرائیل لە دیمەشق بکرێتەوە.
ئەمە وەک وەرچەرخانێکی خێرا دەبینرێت، چونکە بڕیار وابوو تەنها نووسینگەی پەیوەندی بکرێتەوە، بەڵام گوشارەکانی تیمی دۆناڵد ترەمپ پرۆسەکەی خێراتر کردووە.
* کۆبوونەوەی باڵا: بەگوێرەی زانیارییەکانی سەرچاوەکە، بڕیارە بەمزووانە بەرپرسانی باڵای هەردوو و وڵات لەژێر چاودێری واشنتن کۆببنەوە بۆ گفتوگۆکردن لەسەر وردەکاریی رێککەوتنە ئەمنییەکە و هەماهەنگییە ستراتیژییەکان.
* پەیوەستبوون بە ڕێککەوتنەکانی ئیبراهیم: سەرچاوە سوورییەکە ڕوونی کردووەتەوە کە ئەم هەنگاوانە بەشێکن لە ئاراستەی نوێی سووریا بۆ چوونە ناو بازنەی “ڕێککەوتنەکانی ئیبراهیم” و ئاساییکردنەوەی تەواوی پەیوەندییەکان لەگەڵ تەلئەڤیڤ.
