پەیامێکی توند لە ئەمریکاوە بۆ عێراق

SNN-

بەیانی ئەمڕۆ دووشەممە، مارکۆ رۆبیۆ، وەزیری دەرەوەی ئەمریکا، پەیوەندییەکی تەلەفونی لەگەڵ محەمەد شیاع سودانی، سەرۆکوەزیرانی عێراق ئەنجامدا، هۆشداری ئیدارەی ترەمپی پێدا لەوەی حکومەتی داهاتوو لە ژێر هەژموونی ئێران بمێنێتەوە.

وەزارەتی دەرەوەی ئەمریکا ڕایگەیاند، لە پای گواستنەوەی زیندانیانی داعش لە سووریاوە بۆ عێراق، مارکۆ ڕوبیۆ، وەزیری دەرەوە سوپاسی حکومەتی عێراقی کردووە.

لەبارەی پێکهێنانی حکومەتی نوێی عێراق، ڕۆبیۆ و سودانی باسیان لە گفتوگۆ بەردەوامەکانی عێراق بۆ پێکهێنانی حکومەت کردووە، ڕوبیۆ، جەختی کردەوە ئەمریکا بەپێی پێویست هاوکار دەبێت کە عێراق بتوانێت بەتەواوی تواناکانی خۆی وەک هێزێک بۆ سەقامگیری و خۆشگوزەرانی و ئاسایش لە ڕۆژهەڵاتی ناوەڕاستدا بەدیبهێنێت.

ڕۆبیۆ بە سودانی وتووە، عێراق لە توانایدایە ببێتە هێزێکی سەقامگیری بەهێز، بەڵام دەبێت بڕیارەکانتان دروستبێت، ئەگەر حکومەتی عێراق لەژێر دەسەڵات و کاریگەری ئێران بمێنێتەوە، عێراق هەرگیز ناتوانێت بەرژەوەندییەکانی خۆی بخاتە پێش و لە کێشە و گرفتەکانی ناوچەکە ڕزگاری نابێت و پەیوەندیی و هەماهەنگی لە نێوان واشنتن و بەغداش پێش ناکەوێت.