“هیچ ئاماژەیەک نییە بۆ دواخستنی دانیشتنی پەرلەمانی عێراق”
SNN
ئەگەرچی بڵاوکرابووەوە کە دانیشتنی ئەمڕۆی پەرلەمانی عێراق کە تایبەتە بە هەڵبژاردنی سەرۆککۆمار دواخراوە، بەڵام دوو پەرلەمانتار ئەو دەنگۆیەیان رەتکردەوە و رایانگەیاند، لەئێستادا ئامادەکاری بۆ دانیشتنەکە دەکرێت.
ئەحمەد حاجی رەشید ئەندامی پەرلەمانی عێراق بۆ SNN رایگەیاند: تائێستا دانیشتنەکە بە فەرمی دوانەخراوە، دانوستانەکان بۆ گەیشتن بە رێککەوتن بەردەوامن و ئەگەری هەیە بە شێوەی نافەرمی بۆ چەند کاتژمێرێک دوابخرێت.
لای خۆیەوە پۆڵا شەهید سیروان ئەندامی فراکسیۆنی یەکێتی لە پەرلەمانی عێراق پێی راگەیاندین، لە ئێستادا لەناو هۆڵەکەدایە و هیچ ئاماژەیەک نییە بۆ دواخستنی و ئامادەکارییەکان بۆ بەڕێوەچوونی دانیشتنەکە بەردەوامن.
باسی لەوەشکرد کە پێدەچێت، دانیشتنەکە بکرێت، بەڵام تا گەیشتن بە رێکەوتنی لایەنەکان، بە کراوەیی بهێڵرێتەوە.
بە گوێرەی کارنامەی دانیشتنەکە، بڕیارە کاتژمێر 11ی ئەمڕۆ پەرلەمان بۆ هەڵبژاردنی سەرۆککۆماری عێراق کۆببێتەوە و کاندیدی یەکێتیش نزار ئامێدییە.
