بەرپرسێکی یەکێتی بە کۆرۆنا گیانی لەدەستدا
SNN
فوئاد حەمەخان کارگێڕی مەڵبەندی 12ی چەمچەماڵی یەکێتی ئەمڕۆ بە نەخۆشی کۆرۆنا گیانی لەدەستدا.
مەڵبەندی 12ی چەمچەماڵی یەکێتیی نیشتمانیی کوردستان ئەمڕۆ 7ی ئایار هەواڵی گیان لەدەستدانی ئەو کارگێڕەی مەڵبەندەکەیانی بڵاوکردەوە و راشیگەیاند: “بەناوی رێبوار جاف بەرپرسیاری مەڵبەند و سەرجەم هەڤاڵان و کادر و دۆست و لایەنگرانی یەکێتییەوە سەرەخۆشی خۆمان ئاراستەی بنەماڵەی کۆچکردوو دەکەین و داواکارین خوای گەورە بە بەهەشتی بەرینی شاد بکات”.
پێش نیوەڕۆی ئەمڕۆ چوار کەس لە نەخۆشخانەی تایبەت بە کۆرۆنا لە شاری سلێمانی گیانیان لەدەستدا، کە یەکێکیان ئەو بەرپرسەی یەکێتی بوو، بەوەش ژمارەی گیانلەدەستدان بە کۆرۆنا لە هەرێمی کوردستان دەگاتە 24 حاڵەت.
لە چەند رۆژی رابردوودا ژمارەی تووشبوون و گیانلەدەستدان بە کۆرۆنا لە هەرێمی کوردستان بەرزبووەتەوە، بەرپرسانی تەندروستیش هۆکارەکەی بۆ پابەند نەبوونی بەشێک لە هاووڵاتیان بە رێنماییە تەندروستییەکان دەگەڕێننەوە.
