نوری مالیکی: دەستێوەردانی ئەمریکا لە کاروباری عێراق ڕەتدەکەینەوە

SNN

نوری مالیکی، کاندیدی چوارچێوەی هەماهەنگی بۆ پۆستی سەرۆکوەزیرانی عێراق، لە پەیامێکدا بە توندی وەڵامی لێدوانەکانی ئەمریکای دایەوە و دەستێوەردانی ئەو وڵاتەی لە کاروباری ناوخۆی عێراقدا ڕەتکردەوە. مالیکی جەختی لەوە کردەوە کە تا کۆتایی بەردەوام دەبێت لەسەر کاندیدبوونی.

“پێشێلکاریی سەروەریی وڵات”
لە پەیامەکەیدا، نووری مالیکی ڕایگەیاند: “ئێمە بە تەواوی دەستێوەردانی ئاشکرای ئەمریکا لە کاروباری ناوخۆی عێراقدا ڕەت دەکەینەوە.” ناوبراو ئەم دەستێوەردانەی بە “پێشێلکاریی سەروەریی وڵات و دژ بە سیستەمی دیموکراتی” لە عێراقدا لە دوای ساڵی 2003 وەسفکرد. هەروەها بە پێشێلکردنی بڕیاری چوارچێوەی هەماهەنگیی بۆ دیاریکردنی کاندیدی خۆی بۆ پۆستی سەرۆک وەزیرانی لەقەڵەمدا.

“زمانی دیالۆگ، نەک هەڕەشە”
سەبارەت بە شێوازی مامەڵەکردنی نێوان دەوڵەتان، مالیکی جەختی کردەوە کە “زمانی دیالۆگ لە نێوان دەوڵەتاندا تاکە بژاردەی سیاسییە بۆ مامەڵەکردن، نەک پەنابردنە بەر فەرمان و هەڕەشە.”

“تا کۆتایی بەردەوام دەبم”
لە کۆتاییدا، کاندیدی چوارچێوەی هەماهەنگیی سووربوونی خۆی لەسەر بەردەوامبوون لە پرۆسەکە نیشاندا و ڕایگەیاند: “بە پشتبەستن بە ویستی نیشتمانی و بڕیاری چوارچێوەی هەماهەنگی… بەردەوام دەبم لە کارکردن تا دەگەینە کۆتایی، بە شێوەیەک کە بەرژەوەندییە باڵاکانی گەلی عێراق بەدەست بهێنێت.”