وردبینی لە لیستی مووچەی مانگی یەک دەستیپێکرد و تەرازووی پێداچوونەوەش ئامادە دەکرێت

SNN

لە بەغدا وردبینی لە لیستی مووچەی مانگی یەک دەستی پێ کرد و لەچەند ڕۆژی داهاتوو تەواو دەبێت، هاوکات لە هەولێر کارکردن لە ئامادەکردنی تەرازووی پێداچوونەوەی مانگی یەک بەردەوامە و بە ئەگەری زۆرەوە هەفتەی داهاتوو تەواو دەبێت.

ماوەی دوو ڕۆژە تیمی تەکنیکیی وەزارەتی دارایی و ئابووریی هەرێمی کوردستان، لیستی مووچەی بردووەتە بەغدا و ڕادەستی وەزارەتی دارایی عێراق کراوە، لە فەرمانگەی ژمێریاریی وەزارەتی دارایی حکومەتی فیدراڵی وردبینی بۆ دەکرێت.

سەرچاوەیەک لە وەزارەتی دارایی و ئابووری هەرێمی کوردستان گوتی، “وردبینی دەستیپێکردووە و لەماوەی چەند ڕۆژێکدا تەواو دەبێت، ئێستا کار لە ئامادەکردنی تەرازووی پێداچونەوە (میزان موراجەعە)ـی مانگی یەک دەکەین و بە ئەگەری زۆرەوە هەفتەی داهاتوو ئامادە دەبێت.”
لە عێراق دابەشكردنی مووچەی مانگی یەک بەر لە هەفتەیەک دەستیپێكردووە، بەڵام تا ئێستا تەنیا مووچەی دەزگا سەربازی و بەشێكی دەزگا ئەمنییەكان دابەشكراون، دواكەوتنی مووچە لە عێراق پەیوەندی هەیە بە ئەنجامدانی چەند ڕێكارێكی دارایی و كارگێڕی لەلایەك و تەواوكردنی قۆناغی كۆتایی تۆماركردنی ناوی فەرمانبەران و خانەنشینانی نوێ لە سیستەمی پەیڕۆڵ لەلایەكی دیكەوە.