SNN-
دوای ئەوەی چوارچێوەی هەماهەنگیی شیعەکان ڕاگەیێنراوێکیان لەبارەی پابەندبوون بە کاندیدکردنی نوری مالیکی بۆ پۆستی سەرۆکوەزیران بڵاوکردەوە، یەکەم کاردانەوە لە ناو کۆنگرێسی ئەمریکاوە دەرکەوت. جۆو ویڵسن، کۆنگرێسمانی کۆمارییەکان، وەڵامێکی توندی دایەوە و هۆشداریی پێدان.
هۆشداریدان لە بەکەمبینینی ترهمپ
جۆو ویڵسن لە هەژماری خۆی لە تۆڕی کۆمەڵایەتیی ئێکس، ڕوو لە مالیکی و ئەو لایەنانەی بە “بریکارەکانی ئێران لە عێراق” ناوی بردوون، ڕایگەیاند، ئێوە سەرۆک ترهمپ بە کەم دەبینن. ویڵسن نووسیویەتی: “ئەو کارە بکەن و چانسی خۆتان تاقیبکەنەوە، ببینن بزانن چی ڕوودەدات.” هەروەها داوای ڕزگارکردنی عێراق و ئێرانی لە دەست دەسەڵاتی ئێستا کردووە.
مەرجەکانی پاڵپشتیی ئەمریکا بۆ حکومەتی نوێ
ئەم کۆنگرێسمانە کۆمارییە چەند مەرجێکی بۆ پاڵپشتیی ئەمریکا لە هەر حکومەتێکی نوێی عێراق دیاری کردووە. ویڵسن جەختی کردووەتەوە کە پێویستە سەرۆکوەزیران و کابینە نوێیەکە تەنیا خزمەتی بەرژەوەندییەکانی گەلی عێراق بکەن و کۆتایی بەو سەردەمە بهێنرێت کە تێیدا سەروەری و سامانی عێراق دەکرایە قوربانی ئەجێندای دەرەکی.
هەڵوەشاندنەوەی گرووپە چەکدارەکان
یەکێکی دیکە لە مەرجە سەرەکییەکانی ویڵسن بۆ عێراق، پرسی چەکدارەکانە. ئەو ڕایگەیاندووە کە پێویستە حکومەتی نوێی عێراق لە ماوەی 6 بۆ 12 مانگدا، سەرجەم ئەو گرووپە چەکدارانەی سەر بە ئێرانن چەک بکات و بە تەواوی هەڵیانبوەشێنێتەوە.
