سەلام عومەر: دابەشکردنی 100 لیتر نەوتی سپی لە سلێمانی دەستیپێکرد

SNN-

دوای پارێزگاکانی هەولێر و دهۆک، پرۆسەی دابەشکردنی نەوتی سپی بەغدا لە سلێمانی دەستیپێکرد. سەلام عومەر، سەرپەرشتیاری دابەشکردنی نەوتی سپی لە سلێمانی ڕایگەیاند، ئەمڕۆ لە مەڵبەندەکانی 1 و 2 دەست بە دابەشکردنی نەوت کراوە. بڕی 100 لیتر نەوت دەدرێتە هەر خێزانێک و لە بەرامبەردا 31,000 دینار وەردەگیرێت. تاوەکو ئێستاش زیاتر لە 1 ملیۆن لیتر نەوت لە بەغدادەوە گەیشتووەتە سلێمانی.

دۆخی دابەشکردن لە دهۆک و هەولێر

لە پارێزگای دهۆک، زیاتر لە 10 ملیۆن لیتر نەوت گەیشتووە و دوای ناوچە شاخاوییەکان، ئێستا پرۆسەکە لە سەنتەری شار بەردەوامە. بەڵام لە هەولێر، بەرپرسانی دابەشکردنی نەوت ئاماژە بەوە دەکەن کە پرۆسەکە بە خاوی بەڕێوەدەچێت، چونکە بڕی پێویستی نەوت ڕۆژانە لە بەغداوە ناگاتە دەستیان تاوەکو بە خێرایی دابەشی بکەن.

پشکی پارێزگاکان لە نەوتی عێراق

حکومەتی عێراق بڕی 50 ملیۆن لیتر نەوتی سپی بۆ هەرێمی کوردستان تەرخانکردووە. پشکی پارێزگاکانی سلێمانی و هەڵەبجە زیاتر لە 20 ملیۆن لیترە، پارێزگای هەولێر 15 ملیۆن لیتر و پارێزگای دهۆکیش 15 ملیۆن لیتری بۆ دابینکراوە.

جیاوازیی نرخەکان و دابەشکردنی ناوچە شاخاوییەکان

ئەو نەوتەی پێشتر حکومەتی هەرێم لە ڕێگەی وەزارەتی سامانە سروشتییەکانەوە دابەشی دەکرد، نرخەکەی 104,000 دینار بوو بۆ هەر بەرمیلێک و تەنیا لە ناوچە شاخاوییەکان دابەشکراوە. ئێستا بەهۆی نەبوونی نەوتی پێویست، لە سەنتەری شارەکان تەنیا نەوتەکەی بەغدا دابەش دەکرێت کە بۆ هەر 100 لیترێک 31,000 دینار وەردەگیرێت. ئەمە لە کاتێکدایە نرخی بەرمیلێک نەوت لە بازاڕدا لە نێوان 170,000 بۆ 175,000 دیناردایە.

ئاماری ئەو خێزانانەی نەوتیان وەرنەگرتووە

بەگوێرەی کۆتا خشتەی وەزارەتی سامانە سروشتییەکان، لە کۆی گشتیی زیاتر لە 126 ملیۆن لیتر نەوتی دابینکراو لەلایەن هەرێمەوە، نزیکەی 125 ملیۆن لیتری دابەشکراوە. بەهۆی تەواوبوونی ئەو بڕە نەوتە، هێشتا 415,222 خێزان لە وەرگرتنی نەوتی حکومەتی هەرێم بێبەش بوون و چاوەڕێی نەوتی پاڵپشتیکراوی عێراق دەکەن.