دۆناڵد ترەمپ
SNN-
دۆناڵد تڕەمپ، سەرۆکی ئەمریکا، لە کۆنفڕانسێکی ڕۆژنامەوانیدا ڕایگەیاند کە گەورەترین و باشترین کەشتییەکانیان بەرەو ئێران بەڕێوەن و بەمزووانە دەگەنە شوێنی مەبەست. ئاماژەی بەوەش کرد، ئەم هێزە گەورەیە هاوشێوەی ئەو هێزەیە کە پێشتر بۆ ڤەنزوێلا نێردرابوو، ئەوەش وەک ئامادەکارییەک بۆ هەر ئەگەرێک.
بەردەوامی دانوستانەکان لەگەڵ تاران
سەرۆکی ئەمریکا ئاشکرای کرد کە هاوکات لەگەڵ جووڵەی هێزە سەربازییەکان، واشنتن لە گفتوگۆدایە لەگەڵ تاران. تڕەمپ ئاماژەی بەوە دا کە ئارەزوو دەکات لە ڕێگەی دانوستانەوە بگەنە ڕێککەوتن، بەڵام دڵنیایی نەدا لەوەی کە ئایا پڕۆسەی گفتوگۆکان سەرکەوتوو دەبێت یان نا.
هۆشداری لە ئەنجامە نەخوازراوەکان
تڕەمپ جەختی کردەوە کە ئەگەر بتوانن کێشەکان لەگەڵ ئێران چارەسەر بکەن، ئەوە بۆ هەردوولا زۆر باش دەبێت. لە هەمان کاتدا هۆشداری توندی دا و ڕایگەیاند، ئەگەر نەگەنە ڕێککەوتن، ئەوا ڕەنگە شتی زۆر خراپ ڕوو بدات، ئەمەش وەک ئاماژەیەک بۆ ئەگەری پێکدادانی سەربازی لە ناوچەکەدا.
