ئایا عێراق لە رووی مووچەوە روبەڕووی قەیران دەبێتەوە؟

راوێژکارێکی سودانی لەبارەی هەبوونی مەترسی نەمانی پارەی مووچە دڵنیایی دەدات و رایدەگەیەنێت، ئەو دەنگۆیانەی باس لە نەمانی پارەی مووچە دەکەن دوورن لە راستییەوە و مووچە گەرەنتی کراوە.

مەزهەر محەمەد ساڵح، راوێژکاری دارایی سودانی ئەمڕۆ هەینی لە لێدوانێکیدا بۆ سۆمەریە نیوز لەبارەی مووچەوە ئاشکرایکردووە، “هەر دواکەوتنێکی کەم کە لە دابەشکردنی مووچەدا ڕووبدات، بە هیچ شێوەیەک بە واتای قەیرانی دارایی نایەت، هەروەها نیشانەی کورتهێنانی سەرچاوەکان یان جێبەجێنەکردنی پابەندییەکان نییە، بەڵکو تەنها پەیوەندی بە ڕێکارە ڕێکخراوەیی و کارگێڕییە کاتییەکان و میکانیزمی خەرجکردن و بەڕێوەبردنی کاتە داراییەکانەوە هەیە.”
جەختیکردووەتەوە، “مووچەی فەرمانبەران، خانەنشینان و دەرماڵەی چاودێری کۆمەڵایەتی بەتەواوی لە چوارچێوەی دارایی پەسەندکراودا دابینکراون.
ئاماژەی بەوەکردووە، ئەو هەنگاوانە بنەمای سەرەکی، بەردەوامی و ڕێکیی دابەشکردنی مووچەیە، ئەگەر هەندێک جار جیاوازییەکی کەم لە کاتی دابەشکردندا هەبێت، ئەوە حاڵەتێکی کاتییە و کار ناکاتە سەر سەقامگیری دارایی یان توانای دەوڵەت بۆ پێدانی شایستە داراییەکان.
ڕاوێژکارەکەی سەرۆکوەزیران دووپاتی کردەوە کە “دۆخی دارایی جێگیرە و بەڕێوەبردنی نەختینە بە جۆرێک بەردەوام دەبێت کە گەرەنتی خەرجییە گشتییەکان و پاراستنی بژێوی مووچەخۆران و خانەنشینان بکات، هەروەها کار دەکرێت بۆ ئەوەی هەر دواکەوتنێک بۆ کەمترین ئاست کەم بکرێتەوە.”