وتەبێژی وەزارەتی كشتوكاڵ نهێنی قەدەغەكردنی هاوردەكردنی تەماتە لە SNNەوە ئاشكرا دەكات
رنینی تەماتە لە گۆڵێ
عەلی حەمەسەعید-SNN
وتەبێژی وەزارەتی كشتوكاڵی حكومەتی هەرێم ئاماژەبەوەدەكات، لە ئەمڕۆوە بڕیاری قەدەخەكردنی هاوردەكردنی تەماتەی لە دەروازە سنوورییەكانەوە كەوتووەتە بواری جێبەجێكردنەوە ئەو بڕیارەش بە هەماهەنگی لەگەڵ وەزارەتی كشتوكاڵی حكومەتی عێراقی دەركراوە بەغدا بۆ ساخكردنەوەی بەرهەمی خوارووی عێراق و لە وەرزی پێگەیشتنی بەرهەمی هەرێمی كوردستانیش بەغدا هەمان هەنگاو دەگرێتەبەر.
هیوا عەلی، وتەبێژی وەزارەتی كشتوكاڵ و سەرچاوەكانی ئاوی حكومەتی هەرێم بە SNNی راگەیاند: لە ئەمڕۆوە بڕیاری هاوردەكردنی تەماتە لە دەروازەكانەوە بۆ ناو خاكی هەرێمی كوردستان كەوتووەتە بواری جێبەجێكردنەوە، ئەوەش بەمەبەستی پارێزگاریكردن لە بەرهەمی ناوخۆیی جوتیارانی باشوور و هاوكات جوتیارانی هەرێمی كوردستانیش لە داهاتوودا.
ئاماژەی بەوەشكرد، بڕیارەكە لە چوارچێوەی رێكخستنی رۆژمێری كشتوكاڵی و ئەو لێكتێگەیشتنەیە لەنێوان ئێمە و وەزارەتی كشتوكاڵی عێراقدا هەیە، بەجۆرێك، لە ئیستادا ئێستا وەرزی پێگەیشتنی بەرهەمی تەماتەی جووتیارانی پارێزگاكانی ناوەڕاست و باشوری عێراقە، هاوكات لەكاتی پێگەیشتنی بەرهەمی ناوخۆیی جوتیارانی هەرێمی كوردستانیش لە لایەن وەزارەتی كشتوكاڵی عێراقەوە هەمان ڕێكار دەگیرێتە بەر.
وتەبێژی وەزارەتی كشتوكاڵ و سەرچاوەكانی ئاوی حكومەتی هەرێم ئەوەشی خستەڕوو، لەئێستادا رێگە بە هاتنی بەرهەمی ناوخۆیی نێوەڕاست و خوارووی عێراق دەدرێت بۆ بازاڕەكانی هەرێمی كوردستان و لە بەرامبەردا رێگری لە بەرهەمی دەرەكی دەكرێت، كاتێكیش بەرهەمی جوتیارانی هەرێم پێگەیشتن بەهەمان شێوە بەرهەمەكانیان ڕەوانەی پارێزگاكانی باشوور و ناوەڕاستی عێراق دەكرێت، بۆیە بەرهەمی ناوخۆیی پێویستیی بازاڕ پڕ دەكاتەوە و نابێتە هۆی بەرز بوونەوەی نرخەكان.
