پەرلەمانتارێكی یەكگرتوو وردەكاری گرانكردنی كارەبا 24 كاتژمێرییەكە لە SNNەوە ئاشكرا دەكات
عەلی حەمە سەعید – SNN
ئەندامێكی پەرلەمانی كوردستان لە فراكسیۆنی یەكگرتوو ئاماژە بەوەدەكات، لەڕێگەی گرانكردنی نرخی كارەبای 24 كاتژمێری زیانیكی زۆر بە هاووڵاتیان دەگات و باری دارایی سەرشانیان گران دەكات، ئەمە لەكاتێكدایە كە بەبێ ئاگاداری پێشوەختەی هاووڵاتیان ئەو گرانكردنەی كارەبایان خستووەتە بواری جێبەجێكردنەوە.
كاوە عەلی، ئەندامی پەرلەمانی كوردستان لە فراكسیۆنی یەكگرتوو بە SNNی ڕاگەیاند: لەم مانگەوە لەكاتی هاتنەوەی پسولەی كارەبا هاوشێوەی مانگەكانی پێشوو حساب نەكراوە، بەڵكوو لە ڕۆژێكدا بڕی بەكاری هێنان لە 13 كیلۆ وات تێپەڕیكرد، ئەوا مانگانە بری پێنج هەزار دینار زیادە وەردەگرن لە هاووڵاتیان.
ئاماژەی بەوەشكرد، كاتێك پسوڵەی كارەبا دەگەڕێتەوە لە 20 ڕۆژدا ئەوا تەنها 266 كیلۆ وات كاتژمێر بە 72 حساب دەكرێت نەك 400 كیلۆ وات ،واتە تەنها لە ڕۆژێكدا 13,3 كیلۆ وات كاتژمێر بە 72دینار ئەژمار دەكرێت، بەوجۆرەش ئەگەر لە 20 ڕۆژ 400 كیلۆ وات كار كرابێت بە پێی نرخی پڕۆژەی ڕوناكی ئەو 400 واتە جارانی 72 دینار بكەین ئەوا بڕی 28 هەزار و 800 دینار دەكات، بەڵام پرۆژەی ڕووناكی لە بری ئەو نرخە بڕی 33 هەزار و 600 دینار لە هاووڵاتیان وەردەگرن.
ئەو پەرلەمانتارەی یەكگرتوو لە پەرلەمانی كوردستان ئەوەشی خستەڕوو، ئەم زیادكردنەی نرخی كارەبای 24 كاتژمێری بە بێ ئاگاداری پێشوەختەی هاوولاتیانە و تا پسوولەی هاتنەوەی بڕی بەكار هێنانی كارەباش دوا بكەوێت ئەوا بری پارەی كارەباش زیاتر لەسەر هاووڵاتیان دەكەوێت، بۆیە ئەمەش بارگرانییەكی دیكەیە لەسەر هاوولاتیان لەكاتێكدا دۆخی مووچە لەم دۆخە ناهەموارەدایە.
